Дар шаҳри Маскав намоиши эътирозӣ бар зидди зулми уйғурҳо баргузор гардид
Санаи 13-уми декабр дар шаҳри Маскав назди бинои сафоратхонаи ҶМЧ намоиши эътирози танҳоӣ барои дастгирии уйғурҳои дар минтақаи истилошудаи Туркистони шарқӣ баргузор гардид. Дар намоиши эътирози аъзоёни ташкилоти ҳимоятгарони ҳуқуқии «Ёрдам» ва аъзоёни «ҷамъияти фарҳангиву миллии уйғурҳо иштирок варзиданд».
Чи тавре ки ба «Хабарҳо» раиси ташкилоти ҳимоятгарони ҳуқуқи «Ёрдам» Баҳром Ҳамроев иттило дод, эътирозгарон аз ҳукумати Чин талаб намудаанд, ки лагерҳои консентратсионӣро баста уйғурони дар онҷо нигоҳ дошташударо озод намоянд.
Ёдрас мекунем, ки аввалҳои моҳи декабр яке аз қурбониҳои лагери консентратсионии ҳукумати Чин Меҳригул Турсун дар баромади худ дар Конгресси ИМА оиди бедодгариҳое, ки дар хадамоти мазкур карда мешавад нақл намуд. «Фикр кардам, ки бигзор бимираму ин зулму ситамҳоро набинам ва ман аз онҳо талаб мекардам, ки маро бикушанд… Маро ба камераи зеризаминӣ бидуни тиреза ҷо намуданд. Шабҳо 10-15 нафар маҷбур буданд, ки рост истанд, то ин ки дигарон паҳлӯ ба паҳлӯ хоб раванд. Пас аз соат ҷойҳоямонро иваз мекардем. Дар онҷо шахсоне буданд, ки дар давоми сол худро нашустаанд. Пеш аз нонуштаи пагоҳӣ, ки аз об ва биринҷ иборат буд, моро маҷбур мекарданд, то ин ки суруди мадҳии партияи коммунистии Чинро бихонем. Моро маҷбур мекарданд, ки доруҳои номаълум ва моъеи рангаш сафед истеъмол намоем. Аз истеъмоли онҳо дар баъзе аз занон касалии моҳона қатъ мешуд, баъзеи дигар ба хунравӣ гирифтор мешуданд, баъзеи дигар ҳатто дар онҷо фавтиданд. Маро азоб доданд, ҳамаи инро дар ёд дорам. Маро ба утоқе бурданд ва дар онҷо ба сарам тоскулоҳе пӯшониданд. Вақте, ки бо қувваи барқ маро шиканҷа менамуданд, аз зарбаи он вуҷудам меларзид ва дар раги хунам дардеро ҳис мекардам. Маро бо суханҳои қабеҳ дашном медоданд ва талаб мекарданд, ки ба айбҳои бофта шуда иқрор шавам. Онҳо ба ман гуфтанд: «Модарат ва писарат фавтиданд, падарат бошад ба зиндони якумра маҳкум мегардад. Оилаат бо сабаби ту вайрон шуд», нақл мекунад Меҳригул.
Бояд қайд намуд, ки қатли оми уйғурҳо аз тарафи Чин пас аз пурра истило кардани минтақаи Туркистони шарқӣ дар миёнаҳои қарни 20 ба вуқуъ пайвастааст, аз он дам то ба имрӯз сиёсати мустамликадори Чин тағйир наёфтааст — дастгиркунии оммавӣ, қатлкунӣ, инсонҳоро ба лагерҳои консентратсионӣ ирсол намудан якчанд даҳсолаҳо инҷониб идома дорад.
