СУТ: ҷаҳон дар арафаи мавҷи дуввуми пандемия қарор дорад
Ҷаҳон ба марҳилаи нави хатарноки афзоиши пандемияи коронавирус COVID-19 ворид шуд, иброз намуд директори генералии Созмони умумиҷаҳонии тандурустӣ (СУТ) Тедрос Адханом Гебрейесус.
Тибқи иттилои «Коммерсант», ӯ ёдрас кард, ки рӯзи 18-уми июн СУТ дар бораи беш аз 150 ҳазор ҳолати нави сироятёбӣ маълумот пайдо кардааст.
«Тақрибан нисфи ин ҳодисаҳо дар Амрикои Шимолӣ ва ҷанубӣ ба вуқуъ пайвастаанд ва шумораи зиёди ҳодисаҳо дар Осиёи Ҷанубӣ ва Шарқи Наздик ба қайд гирифта шудааст. Ҷаҳон дар як марҳилаи нав ва хеле хатарноки пандемия қарор дорад. Коронавирус ҳоло ҳам босуръат паҳн мешавад, он низ марговар буда, бештари мардум то ҳол дар зери таъсири он қарор доранд», — гуфт Гебрейесус.
Мувофиқи маълумоти Донишгоҳи Джонс Хопкинс, дар ҷаҳон 8,5 миллион ҳолати COVID-19 кашф шудааст. Аксар ҳолатҳо дар ИМА (2,1 миллион), Бразилия (978 ҳазор) ва Русия (568 ҳазор) ба қайд гирифта шудаанд ва бо назардошти системаи рушднаёфтаи соҳаи тандурустӣ, вазъият дар кишварҳои Осиёи Марказӣ на он қадар хуб аст.
Ҳамагӣ дар ҷаҳон тақрибан 455 ҳазор нафар вафот карданд. Тақрибан 4,2 миллион беморони гирифтори коронавирус шифо ёфтанд. Коршиносони байналмилалӣ аз мавҷи дуввуми харобиовари пандемияи муосир огоҳ мекунанд.
