Дар Туркманистон боз аз пайи риш мешаванд
Дар вилояти Лебапи Туркманистон полис бо мардоне, ки ришдор ҳастанд, муборизаро дубора оғоз кард. Дар ин бора радиои Азатлик рӯзи 3 июл бо истинод ба манбаъҳои худ хабар дод.
“Аз рӯзи душанбе, 29 июн, полис боздошти мардони ришдори то 60-соларо шурӯъ кард. Онҳоро ба шӯъба бурда, ришҳояшонро бо роҳи маҷбурӣ метарошанд. Ба боздоштшудагон огоҳӣ дода мешавад, ки агар боз як маротиба ба қонувайронкунӣ даст бизананд, ба 15 шабонарӯз ҳабс карда мешаванд», хабар медиҳад нашрия.
Манбаъҳо инчунин қайд мекунанд, ки мардҳои дастгиршуда ба экстремизми динӣ ва пайравӣ аз мӯдҳои хориҷӣ айбдор карда мешаванд. Кормандони полис мегӯянд, ки эҳтимол боздоштшудагон аз Туркия бо риш меоянд, ки дар он ҷо дар муҳоҷирати меҳнатӣ кору фаолият мекарданд. Мансабдорони ҳукуматӣ бо дастгиршудагон муомилаи дағалона карда, таҳқир мекунанд ва онҳоро ҷосусони турк меноманд.
Ёдрас мекунем, ки чунин рейдҳо бо боздошти мардҳои ришдор дар зимистон ва тирамоҳи соли 2019 дар шаҳри Ашқобод ва вилояти Лебап гузаронида шуда буданд.
Мақомоти ҳифзи ҳуқуқ бо мурури замон бо ришдорон мубориза бурда, дар масҷидҳои кишвар рейдҳо ташкил мекунанд ва диндоронро мунтазам барои гузаронидани сӯҳбати профилактики ба шӯъба даъват мекунанд, то ки онҳо аз диндорӣ даст бикашанд. Инчунин, кормандони амният кӯшиш мекунанд, ки баъзеи онҳоро ҷалб кунанд, то ки бо онҳо ҳамкорӣ намояд.
