Тоҷикистон: Иди Қурбон бидуни намози идона
Шӯрои уламои Маркази исломии Тоҷикистон 22-уми июл санаи таҷлили Иди Қурбонро эълон кард. Саидмукаррам Абдуқодирзода, раиси Шӯрои уламо гуфт, ки ид дар кишвар 31-уми июл ҷашн гирифта мешавад. Вале, аз сабаби коронавирус, намози дастаҷамъонаи идона гузошта намешавад.
Муфтии Тоҷикистон тавсия додааст, ки мусулмонон маросими забҳи қурбонро як соат пас аз баромадани офтоб баргузор кунанд ва аз анъанаи «идгардак» даст кашанд. Тасмими нагузоштани намози дастаҷамъӣ бо тавсияи сарраёсати мубориза алайҳи коронавирус қабул шудааст, хабар доданд ба хабарнигорон дар Маркази Исломии Тоҷикистон.
Ёдрас мекунем, ки Иди Рамазон низ бидуни намози дастаҷамъӣ баргузор шуда буд. Масҷидҳо дар Тоҷикистон бинобар «вазъи эпидемиологӣ» дар аввали моҳи март баста шудаанд. Ҷолиби диққат аст, ки пас аз баста шудани масҷидҳо дар кишвар тамрини омодагӣ ба чорабиниҳои идона ба ифтихори Наврӯз бо ҷалби донишҷӯёни мактабҳо ва донишгоҳҳо идома дошт ва 21-уми март дар шаҳрҳои калони Тоҷикистон чорабиниҳои идона бахшида ба Наврӯз баргузор гардид.
Бисёре аз сокинони Тоҷикистон як суоле доранд: оё манъи намозҳои дастаҷамъӣ дар масҷидҳо марбут ба нигаронии саломатии сокинони Тоҷикистон аст ва ё бо истифода аз ин вазъ мақомот тасмим гирифтанд, ки мардумро дар пайравии дини худ бори дигар маҳдуд кунанд. Зеро зиёда аз ду моҳ аст, ки дар Тоҷикистон тамоми бозорҳо, қаҳвахонаҳо, тарабхонаҳо ва мағозаҳо фаъолият доранд.
Мувофиқи мазҳаби ҳанафӣ, ки мардуми ин минтақа тӯли ҳазор солҳо инҷониб пайравӣ мекунанд, ҳукми гузоштани намози идонаи дастаҷамъӣ воҷиб буда, тарккунандаи он муртакиби гуноҳ мегардад.
