Кормандони ФСБ ду шаҳрванди Тоҷикистонро қатл намуданд
Ду шаҳрванди Тоҷикистон дар шаҳри Тюмени ФР шаби 29 июл аз ҷониби кормандони ФСБ-и Русия кушта шуданд. Кумитаи тафтишот ва ФСБ гуфтанд, ки ҳардуи онҳо қасд доштанд дар қаламрави Тюмен амали террористӣ анҷом диҳанд. Дар ин бора портали иттилоотии «Бомдод» хабар медиҳад.
Ба гуфтаи мақомоти амниятӣ, ҳардуи кушташудагон гӯё узви ДИИШ буданд ва дар ҷараёни як амалиёти вижа ҳангоми муқовимати мусаллаҳона безарар гардонида шуданд. Мақомоти расмии Русия ҷузъиёти дигари ин парвандаро, аз ҷумла маълумот дар бораи шахсияти кушташудагонро ифшо накард. Аммо намояндагии шаҳри Урали рӯзномаи «Коммерсант» бо такя ба манобеи худ хабар дод, ки кушташудагон сокинони Тоҷикистон будаанд.
Дар наворҳои видеоии нашршуда дида мешавад, ки ҷасади ду марди кушташуда дар миёни алафи баланди ҷангалзоре дар наздикии мошини сиёҳ қарор дорад.
Таҳририяти «Хабарҳо» барои равшанӣ даровардан оиди вазъ ба Баҳром Ҳамроев, корманди маркази ҳуқуқи башари «Мемориал» ва роҳбари ҷамъияти муҳоҷирони сиёсии Осиёи Марказӣ муроҷиат кард:
«Аввалан, ман надидаам, ки ин ду тоҷик ҳамлаи террористӣ омода карда бошанд. Ман комилан ба ин бовар надорам. Сониян, вақте ки чунин маълумот ин тавр пешкаш карда мешавад, маълум мешавад, ки ин танҳо кори дасти худи сохторҳои қудратист. Шояд ин ду ҷавон ба ҷое рафтанд, баъзеҳо дар рӯйхат ҳамчун радикал қарор доштанд ва онҳоро бо ягон роҳ фиреб доданд. Мақомоти амниятӣ дар назди худ далеле надорад, аз ҷумла таҳдид ба кишвар, амали террористӣ ё чизи дигаре надорад, танҳо рӯйхат аст. Тибқи ин рӯйхат, ашхосеро қатл мекунанд, тирандозӣ мекунанд, сипас исбот кунед, ки кушташудагон террорист нестанд. Ҳамаи чизро исбот кардан ғайриимкон аст, бинобарин мақомоти амниятӣ мегӯянд, ки онҳо террористанд ва бо ҳамин хотима мебахшанд», гуфт Ҳамроев.
