«Каталоги либосҳои миллӣ» пешниҳод гардид
Кумитаи кор бо занон ва оилаи назди Ҳукумати Ҷумҳурии Тоҷикистон намунаҳои либосҳои миллиро, ки ба духтарон ва занон тавсия дода мешаванд, намоиш дод. Қаблан дар Кумита изҳор доштанд, ки лоиҳаи либосҳои миллӣ ҳам анъанаҳои миллӣ ва ҳам воқеиятҳои замонавиро ба назар хоҳад гирифт. Ва ин лоиҳа на танҳо барои занон, балки ин дафъа барои мардон низ таҳия хоҳад шуд, хабар медиҳад Азия Плюс.
Ҳукумати Тоҷикистон зиёда аз даҳ сол аст кӯшиш дорад ба занони тоҷик як навъ «намунаи либоси миллӣ»-ро таҳмил кунад. Ҳадафи асосии ҳамаи ин амалҳо аён аст: кӯшиши иваз кардани либоси исломӣ бо либоси миллӣ. Ҳамзамон, воситаҳои асосии татбиқи ин нақшаҳо Кумитаи кор бо занон ва оилаи назди Ҳукумати ҶТ, Кумитаи оид ба корҳои дин, танзими анъана ва ҷашну маросимҳои миллӣ, инчунин Вазорати фарҳанг, Вазорати маориф ва илми Тоҷикистон ва Шӯрои уламо мебошанд.
Қобили зикр аст, ки рӯзи 8-уми майи соли ҷорӣ Маҷлиси намояндагони Маҷлиси Олии Тоҷикистон ба қонун «Дар бораи танзими анъана ва ҷашну маросимҳо дар Ҷумҳурии Тоҷикистон» тағйирот ворид кард, ки манъ кардани «воридот, фурӯш ва пӯшидани либосҳое, ки ба фарҳанги миллӣ бегонаанд», инчунин манъи “идгардак” — сайругашти кӯдакон бахшида ба ҷашнҳои Иди Рамазон ва Иди Қурбонро дар бар мегирад. Баъди қабул шудани тағйиротҳо ва ҳатто бидуни интизории қувваи қонунӣ гирифтани онҳо, дар ҳамаи минтақаҳои кишвар рейдҳо ва боздошти занон дар либосҳои анъанавии исломӣ оғоз шуд — рейдҳо дар бозорҳо, дар поликлиникаҳо, беморхонаҳо ва дар шаҳрҳои калон — дар кӯчаҳо гузаронида мешуданд. Гурӯҳҳои корӣ барои гузаронидани рейдҳо ва суҳбатҳои фаҳмондадиҳӣ ташкил шуданд, ки дар онҳо донишҷӯён ва кормандони буҷавӣ, аз ҷумла дар асоси маҷбурӣ, ҷалб шуданд. Рейдҳо тақрибан се ҳафта идома карданд, ки дар ин муддат миёни аҳолӣ норозигӣ афзоиш ёфт ва дар шабакаҳои иҷтимоӣ муҳокимаҳои пурҷӯш ва изҳори норозигӣ қатъ нагардид. Ҳанӯз рӯзи 19 июн Маҷлиси миллии Маҷлиси Олии Тоҷикистон тағйиротҳоро ба қонун «Дар бораи танзими анъана ва маросимҳо» тасдиқ кард, ва 20 июн хадамоти матбуоти Президенти Тоҷикистон хабар дод, ки ӯ дар маҷмӯъ 35 қонунро имзо кардааст, ки «ба ҳифзи арзишҳои аслии фарҳанги миллӣ, пешгирии хурофот ва афсонаҳо, исрофкорӣ ва зиёдаравӣ дар баргузории ҷашну маросимҳо, баланд бардоштани маънавият ва сатҳи иҷтимоиву иқтисодии мардуми Тоҷикистон, инчунин ҳифзи ҳуқуқ ва озодиҳои кӯдак, таълим ва тарбияи кӯдакон дар рӯҳияи башардӯстӣ, ифтихори ватанпарварӣ, эҳтиром ба арзишҳои миллӣ ва умумибашарӣ» равона шудаанд.
Пас аз он ки олимон ва воизони исломӣ аз тамоми ҷаҳон амалҳои режими тоҷикро маҳкум карданд ва баъзе аз воизони машҳури форсизабони Афғонистон, ки дар Тоҷикистон низ шинохта шудаанд, ҳатто ба режими Раҳмон «ҷиҳод» эълон карданд, мақомот ба андеша омаданд, ки чӣ тавр вазъиятро рафъ кунанд. Барои ин онҳо рӯҳониёни ҳукуматиро ҷалб карданд. Ба ин тартиб, раиси Шӯрои уламои Тоҷикистон Саидмукаррам Абдуқодирзода тағйиротҳо ба қонун дар бораи манъи «либоси бегона»-ро ҷонибдорӣ кард ва изҳор дошт, ки либоси миллӣ низ бояд ба меъёрҳои исломӣ мутобиқ бошад. «Мардуми тоҷик либоси махсуси худро дорад. Мардуми араб низ либоси махсуси худро дорад. Ҳар як миллат либоси махсуси худро дорад ва дар баробари ин, меъёрҳои Шариат риоя мешаванд. Ин муҳим аст, дигараш муҳим нест. Зарур нест, ки ба либоси бегона пайравӣ ва тақлид карда шавад», — изҳор дошт раиси Шӯрои уламо. Ҳамзамон, марҳилаи фаъоли рейдҳо муваққатан қатъ гардид, ки дар натиҷа вазъият каме ором шуд. Бо вуҷуди ин, ба назари нозирон чунин аст, режим таслим нашуда, балки як манёври тактикӣ анҷом дод ва комилан манъи ҳиҷоб дар Тоҷикистон ин танҳо масъалаи вақт мебошад.
