Дар Тошканд муҳокимаи рӯҳонии аз Туркия истирдодшуда оғоз ёфт

Суди ноҳияи Учтеппаи шаҳри Тошканд оид ба парвандаҳои ҷиноятӣ рӯзи 19 август баррасии парвандаи ҷиноятии рӯҳонии маъруф Алишер Турсуновро, ки бо тахаллуси Мубашшир Аҳмад миёни мардум шинохта мешавад, оғоз кард. Дар ин бора роҳбари хадамоти матбуоти Суди Олии Ӯзбекистон Азиз Абидов хабар дод.

Тибқи айбномаи эълоншуда, ба Турсунов бар асоси се моддаи Кодекси ҷиноятии Ӯзбекистон иттиҳом эълон шудааст, аз ҷумла:

• моддаи 156, қисми 2 (амалҳои қасдане, ки шаъну шарафи миллӣ ва қадру қимати шаҳрвандонро паст мезананд, эҳсосоти онҳоро вобаста ба эътиқоди динӣ ё бе динӣ таҳқир мекунанд, бо мақсади барангехтани душманӣ, тоқатнопазирӣ ё низоъ нисбат ба гурӯҳҳои аҳолӣ аз рӯи аломатҳои миллӣ, нажодӣ, қавмӣ ё динӣ…);
• моддаи 244–1, қисми 3, банди «г» (истеҳсол, нигаҳдорӣ, паҳнкунӣ ё намоиши маводҳое, ки бо истифода аз ВАО ё шабакаҳои телекоммуникатсионӣ, аз ҷумла интернет, таҳдид ба амнияти ҷамъиятӣ ва тартиботи ҷамъиятӣ доранд);
• моддаи 244–3 (истеҳсол, нигаҳдорӣ, ворид ё паҳнкунии ғайриқонунии маводи мазмуни динӣ).

Дар маҷмӯъ, ба айбдоршаванда муҳлати тӯлонии маҳрумият аз озодӣ таҳдид мекунад.

Ёдовар мешавем, ки Мубашшир Аҳмад, мисли бисёре аз рӯҳониёни дигар, пас аз ба қудрат расидани Шавкат Мирзиёев ба ҷиддияти ниятҳои президенти нав дар мавриди ислоҳот дар кишвар бовар карда, соли 2017 гурӯҳи Azon News Media-ро таъсис дод, ки ба он сомонаи Azon.uz, радиои онлайнӣ Azon FM ва телевизиони интернетии Azon TV дохил мешуданд. Сомонаи Azon.uz яке аз расонаҳои пешбари динӣ ва маърифатӣ дар Ӯзбекистон ба шумор мерафт.

Соли 2021 Мубашшир Аҳмад аз фишори Кумитаи корҳои дини Ӯзбекистон ба сиёсати таҳририяи портал хабар дода буд, ки худи Кумита он замон расман онро рад карда буд. Баъдан, кормандони Azon.uz барои нашри маводи динӣ ҷарима шуданд, ки ба андешаи додгоҳ метавонистанд ба муносибатҳои хориҷии Ӯзбекистон зарар расонанд.

Пас аз он ки портал моҳи августи соли 2023 фаъолияти худро қатъ кард, Мубашшир Аҳмад ба Туркия меравад ва он кишварро, мисли бисёре аз рӯҳониён, ҷои амн барои идомаи фаъолияти худ медонад. Дар моҳи ноябри ҳамон сол ӯ портали нави Azon Global-ро роҳандозӣ кард. Аммо охири декабри ҳамон сол мақомоти амниятии Туркия ӯро боздошт намуда, ба маркази депортатсионӣ бурданд, ки баъди чанд моҳ ӯ аз он ҷо озод шуд.

Ниҳоят, моҳи феврали соли ҷорӣ мақомоти амниятии Ӯзбекистон аз боз шудани парвандаи ҷиноятӣ нисбат ба Турсунов бо иттиҳоми «таъсис, роҳбарӣ ё иштирок дар ташкилотҳои динӣ-экстремистӣ, ҷудоихоҳӣ, бунёдгароӣ ё дигар ташкилотҳои мамнӯъ» хабар доданд. Дар моҳи май ӯро хадамоти махсуси Туркия боз дастгир карда, дар муддати кӯтоҳ ба Ӯзбекистон истирдод карданд.