• Home »
  • Habarho »
  • Дар зиндонҳои Русия зӯроварии ФСБ идома дорад

Дар зиндонҳои Русия зӯроварии ФСБ идома дорад

Сайод Убайдов сокини ҶТ ки айни ҳол даҳ сол мешавад, ки дар ҷумҳурии Адигеяи ФР зиндагӣ ба сар мебарад ва бо парвандаи бофташуда дар терроризм маҳкум гардида буд иброз намуд, ки ӯро дар боздоштгоҳи муваққатии рақами 2 шиканҷа намуда муомилаи ғайриинсонӣ раво дидаанд. Дар ин хусус аз суханҳои ҳимоятгари ӯ сомонаи Кавказ Реалии иттило медиҳад.

Санаи 24-уми декабр дар вақти вохӯрии ҳимоятгар бо Убайдов дар боздоштгоҳи муваққатӣ номбурда иброз намуд, ки 18-уми декабр ӯ аз тарафи кормандони ФСБ латукӯб шудааст.

«Убайдовро кормандони раёсати ФСБ-и ҷумҳурии Адигея латукӯб намуданд, номҳояшонро намедонад, вале дар замони боздошташ рӯйҳои онҳоро дида тавонистааст. Дар боздоштгоҳи муваққатӣ Убайдовро бо қувваи барқ шиканҷа намудаанд, аз зарбаи он дар дастҳояш пайи сурх боқӣ мондааст. Дар рӯяш пайи шиканҷа дида намешавад, инчунин, Убайдов гумон дорад, ки қабурғааш шикастааст», мегӯяд ҳимоятгар.

Илова бар ин, ҳимоятгар аз шароити нигоҳдории Убайдов дар боздоштгоҳи муваққатӣ нақл намуд: «Айни замон зимистон аст, тирезаи утоқ шиша надорад ва он баста намешавад. Дар утоқ ӯ танҳо нигоҳ дошта мешавад. Забони русиро хуб намедонад, метарсад, ки мабодо санадҳои ба ӯ номаълумро имзо менамояд. Бидуни ҳимоятгар кореро анҷом намедиҳад. Ба ӯ гӯён рӯйхати навбатдоронро меоранд, ки ба он имзо гузорад, вале ӯ имзо намегузорад. Барои чунин корҳояш ӯро ба карсер мегузоранд. Ин ҳолат мунтазам идома дорад», мегӯяд ҳимоятгар.

Ёдрас мекунем, ки каме пеш хабарнигорон дар хусуси фишорорӣ ва таҳдидкунӣ нисбати наздикони Убайдов аз тарафи кормандони раёсати ФСБ-и Адигея оиди моилкунӣ барои имзо намудани нишондодҳои эътирофӣ хабар дода буданд. Ҳамсари Убайдов, Сабоҳат Раҳмонова мегӯяд, ки кормандони хадамоти қудратӣ бо ҷудокунӣ аз фарзандонаш таҳдид намуданд.

“Инчунин, таҳдид кардаанд, ки агар ҳимоятгар киро кунам манзили зистамонро бо замин яксон карда, моро ба ватан депортатсия мекунанд. Вақти дастгиркунии шавҳарам кормандони силоҳ ба даст ва ниқобдор ба манзили зистамон зада даромаданд, маро бо чор фарзанди ноболиғам ба як утоқ бастаанд. Манзили зистамонро кофтуков намуданд. Шавҳарамро дар ҷараёни судӣ дидам, ба ман гуфт, ки ӯро бо қувваи барқ шиканҷа намуда, маҷбур мекунанд, ки санадҳоро имзо намояд, ки гӯё бо ҷалбкунӣ машғул шудааст», мегӯяд ҳамсари Убайдов.

Ҷолиби диққат аст, ки тағойи Убайдов, Тоиров Хайриддин низ аз шаҳрвандии худ маҳрум гардида депортатсия шуд. Ӯ низ пештар гуфта буд, ки аз тарафи хадамоти қудратӣ барои рад кардани моилкунии ҷиянаш, то ин ки айбҳои ба ӯ гузоштаро эътироф намояд ба фишорорӣ гирифтор шудааст. Инчунин, нисбати фаъоли ҷамоати мусулмонон Владимир Маёров низ бо сабаби пуштибонии Убайдов таҳдидҳо шудааст. Ба гуфтаи ӯ санаи 25-уми декабр бо воситаи шахсҳои сеюм ба ӯ расонидаанд, ки агар аз кори мазкур даст накашад ва канораҷӯӣ накунад оқибаташ монанди Убайдов хоҳад шуд.