Хатлон: хона ба хона барои ошкор кардани “ифротгароён”

Дар вилояти Хатлони Тоҷикистон хона ба хонаҳо гаштан бо мақсади сӯҳбатҳои фаҳмондадиҳӣ бо аҳолӣ дар мавзӯи радикализм ва ифротгароӣ идома дорад. Дар ин чорабинӣ 1800 хизматчии давлатӣ иштирок доранд – асосан кормандони соҳаи маориф, тандурустӣ ва вакилони маҳаллии ноҳияҳо, хабар медиҳад «Настоящее время». Ба гуфтаи мақомот, ҳадафи ягонаи чунин суҳбатҳо пешгирии радикализатсияи ҷавонон аст. Гурӯҳҳои тарғиботӣ бо мардум дар бораи либоси миллии занона, ки ба ҷои пӯшидани ҳиҷоб аз ҷониби режим пешбарӣ мешавад, суҳбат мекунанд. Дар бораи хешовандоне, ки дар хориҷа зиндагӣ мекунанд ва гӯё метавонанд ифротгаро шаванд, суол мекунанд ва инчунин ҷавононро барои хизмат дар артиш ташвиқ менамоянд.

Раиси вилояти Хатлон Давлаталӣ Саид қаблан хабар дода буд, ки мансабдорон, ки корҳои тарғиботиро анҷом медиҳанд, дарсҳои махсусро барои муошират бо аҳолӣ гузаштаанд. «Барои омӯзиши ин гурӯҳҳо дар ҳамаи ноҳияҳо мо бо ҷалби мутахассисон семинарҳо баргузор намудем. Ҳамчунин, барои чунин чорабиниҳо тавсияномаҳои махсус таҳия карда шудааст», — изҳор дошт ӯ.

Дар тӯли ҳафт моҳи соли ҷорӣ гурӯҳҳои тарғиботӣ тақрибан 622 ҳазор хонаро зиёрат карданд. «Ҳар рӯз муовинони раиси вилоят оид ба мафкура ва масъалаҳои иҷтимоӣ дар формати онлайн ҷаласаҳо бо ин гурӯҳҳо баргузор менамояд. Мо аз онҳо маълумот мегирем, ки дар он рӯз чанд хонаро зиёрат кардаанд. Ҳамчунин, ҳисоботи оилаҳое, ки бо онҳо зарур аст, сӯҳбатҳои тӯлонӣ гузаронида шавад, тартиб дода мешаванд: онҳоро ба рӯйхати ягона ворид мекунем ва бо онҳо кор бурда мешавад», — мегӯяд муовини раиси вилояти Хатлон Анзурат Саломзода.

Дар ҳамин ҳол, гурӯҳҳои тарғиботӣ муоширати худро бо мардум дар аксҳо сабт мекунанд ва ҳисоботҳоро дар шабакаҳои иҷтимоӣ нашр мекунанд. Танқидгарони ҳукумат дар ин робита мегӯянд, ки хона ба хона гаштани мансабдорон ҷуз дахолат ба ҳаёти шаҳрвандон ва корҳои шахсии онҳо чизи дигаре нест. Мансабдорон инро рад мекунанд ва мегӯянд, ки усули интихобшуда танҳо барои ошкор кардани оилаҳои «хеле осебпазир» мебошад ва барои мубориза бо радикализатсия миёни ҷавонон зарур аст. «Масъалаи радикализатсия дар вилоят ташвишовар аст, бахусус пайвастани ҷавонон ба ҳаракатҳои гуногуни ифротгаро. Ҳолатҳои зиёде ошкор шудаанд«, — мегӯяд Давлаталӣ Саид.

Мушоҳидон қайд мекунанд, ки зери калимаи «радикализатсия» ҳар гуна фаъолияти исломӣ дар назар дошта мешавад. Дар кишвар солҳо боз бо баҳонаи «радикализатсия», «ифротгароӣ ва терроризм» парвандаҳои ҷиноӣ нисбати сокинон, бахусус нисбати ҷавонони фаъоли динӣ бофта мешаванд.