• Home »
  • Habarho »
  • Режими Раҳмон тафсири расмии ҳодисаи «исён»- ро дар КИ-3 эълон намуд

Режими Раҳмон тафсири расмии ҳодисаи «исён»- ро дар КИ-3 эълон намуд

Пас аз хомӯшии дароз оиди воқеаи ногуворе, ки дар санаи 7-уми ноябр дар яке аз маҳбасхонаҳои шимоли Тоҷикистон ба вуқӯъ пайвастааст дар ниҳоят режим оиди ҳодисаи мазкур баёноти расмӣ баровард.

Дар вақти бетартибиҳое, ки шаби  санаи 8-уми ноябр дар муассисаи ислоҳии рақами 3 шаҳри Хуҷанд ба вуқуъ пайвастааст 21 нафар исёнгарон безарар гардонида шуд — иброз намуд Вазири умури хориҷии Тоҷикистон Сироҷидин Муҳридин санаи 22-уми ноябр дар вохӯрии сарони хадамотҳои сиёсати хориҷӣ дар формати Иттиҳоди Аврупо ва Осиёи Марказӣ. «Посбонон ва кормандони муассиса исёнгаронро ба гуфтугӯ хондаанд. Вале, маҳбусон муқовиматро идома додаанд, якчанд маҳбусон кӯшиш намуданд фирор кунанд… 12 нафар маҳбусони кушташуда барои иштирок дар ҷангҳои Сурия ва Ироқ дар сафи «ДИ» адои ҷазо менамуданд, се нафари дигар аъзои гурӯҳҳои экстремистӣ «Ансоруллоҳ», «Ҷундуллоҳ» ва «Ҳаракати исломии Ӯзбекистон» буданд. Шаш нафари боқимонда барои ҷиноятҳои вазнин ба монанди куштор ва маводи мухаддир ба миқдори зиёд маҳкум шуда буданд», изҳор намуд Вазири умури хориҷии Тоҷикистон. Бояд қайд намуд, ки дар натиҷаи хомӯш кардани ба ном «исён» тибқи манбаъҳои гуногун зиёда аз 50 нафар маҳбусон кушташуданд, чунин маълумотро радиои Озодӣ низ ба як рӯйхати кушташудагон такя намуда иттилоъ дод. Инчунин, сабабҳои бардоштани исён низ маълум гардид, яъне итоат накардани оммавии маҳбусон бо сабаби муносибати дурушти кормандони муассиса бо яке аз маҳбусон ба вуқуъ пайвастааст.

Барои шарҳ додани тафсири расмии ҳукумат оиди «нақши исломгароён» дар исёни шуда гузашта, таҳририяти «Хабарҳо» ба собиқ маҳбус бо номи Одил ки барои фаъолияти динӣ адои ҷазо намуда буд муроҷиат кард.

«Вазъият оиди риоя шудани ҳуқуқи маҳкумшудагон дар муассисаҳои ислоҳии Тоҷикистон ҳама вақт дар сатҳи паст қарор дошт, аниқтараш маҳкумшуда ғайр аз ҳуқуқи қабул намудани маводҳои хурока ва дигар чизҳои зарурӣ (передача) ва вохӯрӣ бо наздиконаш дигар ба чизе ҳуқуқ надошт. Поймолшавии ҳуқуқҳои маҳкумшудагоне, ки бо айбҳои динӣ маҳкумшудаанд аз соли 2011-2012 шурӯъ карда боз ҳам зиёд гардидааст, вақтҳои охир ҳолат то ҷое расидааст, ки гузоштани намози бомдод ҳамчун вайрон кунии тартибот ба ҳисоб рафта, аз тарафи маъмурият ҷазо дода мешавад. 5 соли охир даҳҳо нафар маҳкумшудагоне, ки бинобар доштани ақидаи динӣ маҳкум шудаанд, дар давоми адои ҷазояшон иловатан боз маҳкум гардиданд. Чунин таҷрибаро аз Ӯзбекистони ҳамсоякишвар омӯхтанд. Оиди даст доштани исломиҳо дар исёне, ки дар колонияи ислоҳии рақами 3-и шаҳри Хуҷанд рух додааст, аз аввал маълум буд, ки варианти қулайтарин ба режим ин гурӯҳҳои мамнӯъшударо муттаҳам сохтан мебошад ва паҳн кардани маълумот оиди дар қазия даст доштани ДИ ба манфиати режим рост омад. Зеро, чунин раъӣ ҳамаи ҳамҷамъияти байналмиллалиро қаноатманд мегардонад, ки дар навбати худ режим бо ин метавонад  тафтишоти гунаҳкорони аслии қазия ва сабабҳои онро ба фойдаи худ тоб диҳад. Инчунин бо баҳони мубориза алайҳи «терроризм ва экстремизм» режим барои худ роҳеро пайдо мекунад, ки ҳамаи намуди дигарандеширо решакан намуда, пеши роҳи бедории исломиро мегирад, то дар баъзе табақаҳои ҷомеа он пайдо нагардад. Худи таъиншавии муовини сардори амният ба мансаби сардори иҷроиши ҷазо бошад, маънои суханҳои дар боло зикршударо ифода мекунад».

Ёдрас мекунем, ки санаи 23-уми ноябр муовини вазири адлия ва сардори сарраёсати иҷроиши ҷазои ҷиноятӣ ҶТ Изатулло Шарифзода аз вазифа барканор шуд ва ба ҷои сардори сарраёсати иҷроиши ҷазои ҷиноятӣ ҶТ муовини вазири КАДМ ҶТ Мансурҷон Умаров таъйин гардид.