• Home »
  • Habarho »
  • Тоҷикистон: бо ҳиҷоб ба «қароргоҳҳои давлатӣ ва хусусӣ» даромадан манъ мешавад

Тоҷикистон: бо ҳиҷоб ба «қароргоҳҳои давлатӣ ва хусусӣ» даромадан манъ мешавад

Мақомоти тоҷик тасмим гирифтанд, ки дар асоси қонунӣ даромадани занҳои сатрпӯш ба қароргоҳҳои давлатӣ ва хусусӣ манъ карда шавад.

Чи тавре ки радиои Озодӣ менависад, ҳоло як гуруҳи махсуси корӣ ба таҳияи тарҳе пардохтаанд, ки интизор меравад вуруди занҳои ҳиҷобдорро ба тамоми идораву муассисаҳо, новобаста аз шакли моликияташон, мамнӯъ кунад. Гуруҳ дар назди Маркази миллии қонунгузории Тоҷикистон ташкил шудааст.

Мушоҳидон қайд мекунанд, ки кори мазкур қадами навбатии режими Раҳмон барои қатъиян манъ кардани пӯшидани либоси исломӣ ба занон дар кишвар мебошад. То ба имрӯз хадамотҳои қудратӣ дар ҷойҳои ҷамъиятӣ рейдҳо мегузаронданд ва занҳои ҳиҷобпӯшро дастгир намуда ба онҳо бо баҳонаи пӯшидани ҳиҷоб ба маданият ва фарҳанги тоҷик хилоф аст гӯён таҳдид мекарданд.

Як мақоми Маркази миллии қонунгузорӣ рӯзи 14-уми декабр дар сӯҳбат бо Радиои Озодӣ гуфт, ки комиссия пас аз супориши Дастгоҳи иҷроияи президент дар ин замина ба кор шурӯъ кард. Ба иттилои ин масъули Маркази миллии қонунгузорӣ, қарор аст, рӯзи 18-уми декабр дар ҷараёни як нишаст ё мизи гирде дар Душанбе намояндагони тамоми вазорату идораҳои давлатии Тоҷикистон ин масъаларо баррасӣ хоҳанд кард. Дар Маркази миллии қонунгузорӣ мегӯянд, бар пояи назару андешаҳои вазорату идораҳои давлатӣ, тарҳи қонуни нави маҳдудкунандаи доштани рӯсариву ҳиҷобро таҳия мекунанд.

Муаллифи ташаббуси манъи қонуни рӯсариву ҳиҷоб барои бонувони тоҷик Кумитаи занон ва оилаи Тоҷикистон мебошад. Ин кумита дар як нома аз Додситонии кулли Тоҷикистон дархост кардааст, ки ба таври қонунӣ вуруди занҳоро бо сатру ҳиҷоб ба идораву ташкилот новобаста аз шакли моликият, яъне ҳам давлатӣ ва ҳам ғайридавлатӣ, манъ кунад.