Тоҷикистон: ширкати чиниро аз пардохти андоз озод карданд
Ҳукумати Тоҷикистон ширкати чинии ТВЕА-ро аз пардохти Андоз аз арзиши иловашуда (ААИ) ва боҷи гумрукӣ барои воридоти технология ва ҷиҳозҳо барои истихроҷи тилло дар ду конҳои ноҳияи Айнӣ — «Кумарги Боло» ва «Дуобаи Шарқӣ» озод намуд, дар ин хусус радиои Озодӣ иттило медиҳад. Гуфта шудааст, ки вориди 615 намуди ҷиҳозҳо, техника ва дигар амволи ширкати ТВЕА, аз он ҷумла нақлиётҳои сабук ва боркашонӣ, трансформаторҳо ва дигар ҷиҳозҳо аз андозбандӣ озод карда шуданд.
Ёдрас мекунем, ки ҳукумати Тоҷикистон бо баҳонаҳои гуногун на танҳо ба ширкатҳои хориҷӣ, хусусан ба ширкатҳои чинӣ конҳои боигариҳо ва захираҳои маъданиро медиҳад, балки барои онҳо шароити мусоидро низ фароҳам месозад, ки чунин шароитро барои аҳолии кишвар намекунад. Режими Раҳмон бо афзоиш додани нархи хизматрасониҳои коммуналӣ ва захираҳои энержӣ ё ин ки бо илова намудани андози иловагӣ зиндагии сокинони кишварро ба ҳолати танг меорад. Масалан, аз 1-уми сентябри соли ҷорӣ дар кишвар нархи қувваи барқ боз ба 17% афзоиш ёфт.
