Тоҷикистон дар рейтинги Freedom House фурӯ рафт
Созмони байналмилалии ҳуқуқи башари Freedom House рейтинги навшудаи «кишварҳои ғайриозод», «Озодӣ дар ҷаҳон»-ро нашр кард.
Дар рейтинги навшуда Тоҷикистон аз 100 хол 7 хол гирифта, ба ин васила дар муқоиса бо натиҷаи соли гузашта, ки 8 хол аз 100 гирифта буд як хол фурӯ рафт. Дар ҷадвали «ҳуқуқҳои сиёсӣ» чуноне ки як сол пеш буд, рақами 0 нишон дода шудааст, ки маънои бадтаринро дорад.
Ба ҷуз аз Тоҷикистон ҳамсояҳои минтақвӣ низ дар қатори кишварҳои “ноозод” ҷойгиранд: Қазоқистон (23 хол), Қирғизистон (27 хол), Ӯзбекистон (12 хол) ва Туркманистон бо 2 хол ба феҳристи “бадтаринҳо” шомил шуданд.
Қобили таваҷҷуҳ аст, ки тибқи натиҷаҳои таҳлили тамоми созмонҳои ҳомиёни ҳуқуқи ғарбӣ ва ниҳодҳои мухталиф, вазъи саркӯби ҳамагуна фаъолияти сиёсии ғайринизомӣ дар кишварҳои Осиёи Марказӣ беш аз 30 сол боз ваҳшатнок боқӣ мемонад, аммо ин ба ҳеҷ ваҷҳ ба ҳукуматҳои мамлакатҳои Ғарб барои ба роҳ мондани муносибатҳо бо диктаторҳои Осиёи Миёна ва доимо «истиқбол кардани ислоҳотҳо» монеагарӣ намекунад.
Муаллифони гузориш инчунин қайд мекунанд, ки кишварҳои Қафқоз ва Осиёи Марказӣ сателлитҳои Москва маҳсуб меёбанд, аммо Озарбойҷон, Қазоқистон, Тоҷикистон, Туркманистон ва Ӯзбекистон аз эътирофи ишғоли қаламравҳои Украинаро аз ҷониби Русия худдорӣ карда, ба таҳримҳои нисбати бонкҳои Русия ҷоришударо риоя мекунанд.
