Тамринҳо барои пароканда кардани эътирозгарон
21-уми январ дар Хуҷанд дар ҳудуди қисми низомии 3501 машқҳои тактикӣ баргузор шудаанд. Тибқи иттилои сомонаи Вазорати корҳои дохилии Тоҷикистон, мақомоти ҳифзи ҳуқуқи вилояти Суғд усулҳои фурӯ нишондани эътирозҳои оммавӣ ва ошӯбҳоро кор карда баромадаанд.
Тибқи иттилои Вазорати корҳои дохилӣ, тамринҳо як ҳафта идома ёфта, ҳадафи онҳо «ҳифзи тартиботи ҷамъиятӣ, ҳифзи ҷони сокинон ва ҳифзи моликияти ҷамъиятӣ ва давлатӣ ҳангоми тазоҳурот» будааст.
Ба гуфтаи коршиносон, потенсиали эътирозии аҳолии кишвар ҳар рӯз меафзояд, алахусус дар шароити мушкилоти иқтисодӣ, ки эҳтимоли зиёд режими Раҳмонро ба тарс овардааст.
Вале, мақомоти ҳифзи ҳуқуқ ишора карданд, ки тамрини мазкур нақшагӣ будааст ва афзудаанд, ки чунин тамринҳо ҳамасола барои санҷиши маҳорати кормандон баргузор мешаванд.
Ёдрас мекунем, ки мақомоти ҳифзи ҳуқуқи Тоҷикистон чунин чорабиниҳоро дар нимаи моҳи майи соли 2018 дар Душанбе пас аз гирдиҳамоиҳои эътирозӣ, ки дар Арманистон оғоз ёфтанд ва дар натиҷа ҳукумати ин кишвар иваз шудааст, баргузор карданд. Инчунин дар моҳи октябри соли 2014, режими Раҳмон дар робита бо гузоришҳо дар бораи гирдиҳамоиҳои ғайриқонунии мухолифин дар пойтахт, дар Душанбе ва як қатор шаҳрҳои калони кишвар чораҳои бесобиқаи амниятӣ андешида шуда буд.
