Захар Прилепин: пас аз Украина Ӯзбекистонро бояд ишғол кард

Изҳороти ахири таблиғгари маъруфи рус, нависанда ва узви «Тими Путин» Захар Прилепин дар бораи таҷовуз ба Ӯзбекистон ва пайвастани он ба Русия, мисли сенарияи Украина, вокуниши густардаеро ба бор овард.

«Самимона ҷонибдори ҳамроҳ кардани қаламравҳое ҳастам, ки аз онҷо муҳоҷирони меҳнатӣ ба Русия меоянд. Ба онҳо на дар ин ҷо, балки дар он ҷо, масалан, дар Ӯзбекистон забони русиро биомӯзонанд. Гуфтаҳоям аз шӯхӣ берун аст.

Ин ба мо имкон медихад, ки бигуем: «Азбаски ду миллион нафар шаҳрвандони шумо дар қаламрави мо қарор доранд, мо ба қаламрави шумо даъво мекунем. Зеро аксарият аллакай дар ин ҷо ҳастанд ва ба тарафдории он овоз додаанд”. Пас аз намоиши ҳарбӣ дар Киев кӣ моро аз анҷом додани кори муфид дар қаламрави Авруосиё бозмедорад?», — гуфт Прилепин рӯзи 20 декабр зимни як нишаст дар маркази матбуотии «Русия имруз».

Ёдрас мекунем, ки Захар Прилепин ҳамраиси ҳизби “Русияи одил – ватанпарварон – барои ҳақиқат” ва узви ситоди марказии Фронти халқии умумирусиягӣ (ОНФ), ки бо ташаббуси Путин таъсис шуда буд ва моҳи августи соли 2023 дар ҳайати Гвардияи Русия, ки аз собиқадорони амалиёти ҷангӣ дар Сурия ва Украина иборат аст, рутбаи подполковник ва вазифаи муовини фармондеҳи полки таъиноти «Оплот» оид ба корҳои ҳарбӣ-сиёсиро қабул намуд.

Мария Захарова сухангӯи расмии Кремл, гуфтаҳои Прилепинро дуру дароз шарҳ дода, таблиғгарро барои изҳороти иғвоангезаш маҳкум накард. «Ҷониби Русия борҳо таъкид кардааст, ки ҷалби захираҳои меҳнатӣ аз хориҷи кишвар, пеш аз ҳама, аз кишварҳои дӯст ба манфиати ҳам Русия ва ҳам давлатҳое, ки чунин хидматрасони содир мекунанд, мувофиқат мекунад. <…> Изҳороти Прилепин ақидаи шахсии ӯст, ки мавқеи расмии Федератсияи Русияро инъикос намекунад», — гуфт Захарова.

Ҳамзамон раиси ҳизби “Русияи одил – ватандӯстон – барои ҳақиқат” Сергей Миронов комилан ба тарафдории ҳамтои ҳизбаш баромад кард. «Чунин барномаи сиёсиро ҳизби мо пеш нагирифтааст… Ин танҳо фикру ақида аст… ақидаи нависандаи боистеъдод, ватандӯсти ҳақиқии кишварамон аст на чизи дигар», — гуфт Миронов.

Ҳамин тариқ, ҳеҷ яке аз сиёсатмадорони рус гуфтаҳои Прилепинро маҳкум ё рад накард ва ба ин васила идеяи аз ҷониби Прилепин баёншударо бавосита тасдиқ карданд.

Дар ҳамин ҳол, коршиносон аз мақомоти Ӯзбекистон даъват кардаанд, ки ингуна изҳоротро ҷиддӣ қабул намоянд.

«Захар Прилепин, ҷонибдори ҳамла ба Ӯзбекистон буда, замоне дар сафи мухолифин буд. Пас аз ишғоли Қрим муносибати ӯ ба Путин тағйир ёфт. Пеш аз ҷанги Украина, Прилепин борҳо бо шиорҳои «Украина бояд ишғол карда шавад!» баромад кардааст. Аз ин рӯ, ӯ таҳти таҳримҳои Иттиҳодияи Аврупо қарор дорад. Имрӯз, Прилепин ҳамчун як сиёсатмадори наздик ба Кремл ақидаеро паҳн мекунад, ки Осиёи Марказӣ ва Ӯзбекистон бояд забт карда шавад.

Прилепин як сиёсатмадори расмӣ, раҳбари расман сабтиномшудаи ин ҳизб ва яке аз раҳбарони эътилофи якҷо бо «Русияи одил» мебошад. Яъне, эҳтимоли зиёд вуҷуд дорад, ки изҳороти Прилепин назар, лоиҳа ва рӯҳияи Кремл аст. Прилепин бо эҳсосот сухан нагуфт. Фикр мекард, суханҳояшро интихоб мекард. Ин занги ҷиддӣ барои давлат мебошад!», — навиштааст сиёсатшиноси маъруфи ӯзбек Камолиддин Раббимов дар саҳифаи Фейсбуки худ.

Вале, мақомоти Ӯзбекистон вокуниши хеле ботамкинона нишон доданд ва то ҳол кӯшиш карданд, ки ба аудиторияи дохилӣ хашмгин будани худро нишон диҳанд: 21 декабр Сафири Фавқулода ва Мухтори Федератсияи Русия дар Ӯзбекистон Олег Малгинов ба Вазорати корҳои хориҷии Ӯзбекистон даъват карда шуд. Дар матне, ки дар сомонаи ин хадамот нашр шудааст, қайд карда мешавад, ки намояндаи Федератсияи Русия аз изҳороти нависандаи рус дар бораи пайвастани Ӯзбекистон ба Русия «бо ҳисси нигаронии амиқ» қабул карда шудааст. «Чунин пешниҳодҳои андеша нокарда аз ҷониби раҳбарони ҳизбҳои як кишвари дӯст ба рӯҳияи шарикии ҳамаҷонибаи стратегӣ ва иттифоқи байни Ҷумҳурии Ӯзбекистон ва Федератсияи Русия мувофиқат намекунад», — гуфта шудааст дар сомонаи Вазорати корҳои хориҷии Ӯзбекистон.

Ёдрас мекунем, ки бо ба сари қудрат омадани Шавкат Мирзиёев дар Ӯзбекистон, кишвар пас аз солҳои тӯлонии мувозинати нисбии байни абарқудратҳо, ки раисиҷумҳури пешин Каримов тавонист онро нигоҳ дорад, ошкор ба сӯи Русия майл мекунад. Аз ин рӯ, ҳеҷ як изҳорот наметавонад ин далелро лағв кунад, ки ширкатҳои русӣ оҳиста-оҳиста иқтисоди кишварро ба даст мегиранд, тамоми аҳолӣ кайҳо боз шабакаҳои телевизионии давлатии Русияро пайгирӣ менамоянд ва Ӯзбекистон ба яке аз кишварҳои мувозии воридот табдил ёфтааст, ки Русияро аз таҳримҳои Ғарб наҷот медиҳад.