• Home »
  • Habarho »
  • Муҳоҷирони меҳнатӣ гаравгони ФСБ-и Русия гаштаанд

Муҳоҷирони меҳнатӣ гаравгони ФСБ-и Русия гаштаанд

Муҳоҷирони Ӯзбекистон, ки дар маркази нигоҳдории муваққатии шаҳрвандони хориҷа дар вилояти Самара нигоҳ дошта мешаванд ба хабарнигорон маълумот доданд, ки онҳо бе иҷозати ФСБ-и Русия ба ватан баргашта наметавонанд. Роҳбарияти (МНМШХ) ба «Озодӣ» хабар додааст, ки ӯзбекҳое, ки дар марказ нигоҳ дошта мешаванд дар назорати хадамотҳои махсуси русӣ мебошанд. Тибқи маълумоти ҳимоятгарони ҳуқуқ, вақтҳои охир хадамотҳои махсуси Ӯзбекистон дар минтақаҳои Русия фаъолияташонро шурӯъ намудаанд.

Дурбеки 22 солае, ки ду моҳ инҷониб дар яке аз марказҳои нигоҳдории муваққатии шаҳрвандони хориҷа дар вилояти Самара нигоҳ дошта мешавад, ба хабарнигорон гуфт, ки хадамоти махсуси Русия ба ӯ барои баргаштанд ба Ӯзбекистон иҷозат намедиҳанд. «10-уми октябр маро бо ҳамроҳии дӯстам кормандони ФСБ дастгир намуда ба шӯъба бурданд. Сипас моро ба хотири вайрон намудани қонунгузории муҳоҷиратии Русия суд карданд. Аз мо талаб намуданд, ки баъзе санадҳоро имзо намоем, пас аз 10 шабонарӯз мо бояд кишварро тарк мекардем. Ба ҳамаи санадҳо имзо гузоштем, сипас ба дастамон дастбандро пӯшонданд ва ба шаҳри Толятти бурданд. Як моҳ пеш билетҳои харидаамонро қатъ карданд ва гуфтанд, ки ФСБ ба мо тарк кардани кишвари Русия  иҷозат намедиҳад.  Ҳадди ақал бо кадом асос моро дошта истодаанд, намегӯянд. Ман бо дӯстам ба ягон ҷинояти вазнин даст назадем», гуфт Дурбек. Тибқи гуфтаҳои ӯ, кормандони махсуси Русия онҳоро ба хотири фурӯши колоҳои майда-чуйда дар яке аз кӯчаҳои Самара дастгир намуданд. Сипас кормандони хадамоти махсус бо роҳи фиреб ҷавононро маҷбур карданд, то ин ки ба санадҳои номаълум имзо гузоранд.