Дар Тоҷикистон имом-хатибон муҷассамаи Ленинро таҷдид намуданд
Дар Тоҷикистон имом-хатибон бо маблағи ҷамъшудаи садақоти намозгузорон муҷассамаи Владимир Ленинро аз нав таҷдид намуданд.
Бинобар иттилои радиои Озодӣ, муовини раиси ҳукумати ноҳияи Шаҳритус Меҳринисо Раҷабзода ба хабарнигорон иброз намуд, ки имомони маҳаллӣ ихтиёран ва бо маблағи садақоти намозгузорон муҷассамаи Ленинро таъмир намуданд.
«Ташаббуси амали мазкурро худи имомон зоҳир намудаанд. Аз тарафи онҳо муҷассама ва гирду атрофи он таъмир карда шудааст, инчунин фаввора дар назди муҷассама низ ба кор дароварда шуд», мегӯяд Меҳринисо Раҷабзода.
Инчунин, яке аз имом-хатибон ба хабарнигорон тасдиқ намуд, ки ҳафтаи гузашта ҳамаи садақоти ҷамъшудаи намозгузорон дар ноҳия барои таҷдиди муҷассамаи Ленин равона карда шудааст.
Ёдрас мекунем, ки тибқи Ислом сохтани ҳайкал ва муҷассамаҳои одамон, аз он ҷумла таҷдид намудан қатъиян манъ карда шудааст. Бо кадом сабаб имом-хатибон муҷассамаи даҳрӣ ва яке аз қотилони асосии мусулмонон қарни 20-ро таҷдид намуданд то ҳол бидуни ҷавоб мемонад.
