Русия: дар минтақаи навбатӣ нархи патент боло хоҳад рафт
Дар шаҳри Челябински ФР ҳукумати маҳаллӣ мехоҳанд барои муҳоҷирони меҳнатӣ нархи патентро афзоиш диҳанд, дар ин хусус сомонаи URA.ru ба сардори сарраёсати меҳнат ва шуғли аҳолии вилоят Владислав Смирнов такя намуда иттило медиҳад.
Ба ақидаи Смирнов, чунин иқдом ба буҷаи махаллӣ 150 млн рубл даромади иловагӣ меорад. «Аз соли 2014 инҷониб квота ба қувваи кории хориҷӣ аз 10,4 ҳазор то 204 нафар ихтисор шудааст. Ҳамагӣ дар минтақа бо ҳисоби миёна дар як сол 18 ҳазор нафар бо патент кору фаъолият мекунад. Бо ин мо рақами мазкурро бо нархи патент ба танзим медарорем. Айни замон нархи патент дар як моҳ 4,1 ҳазор рублро ташкил медиҳад, ба буҷаи маҳаллӣ дар як моҳ 450 млн рубл даромад меояд. Пешниҳоди ман ин аст, ки дар соли 2020 нархи патент афзоиш дода шавад. Дар ҳолати афзоиши он ба 5 ҳазор рубл, дар як моҳ мо метавонем ба буҷа 600 млн рубл даромад биёрем», — гуфт Смирнов дар маҷлиси ҳукумати маҳаллӣ.
Ҳамин тариқ, муҳоҷирони меҳнатӣ на танҳо камчинии қувваи корӣ, балки ба беҳтарин манбаи такмилдиҳии буҷаи Русия табдил ёфтанд. Ёдрас мекунем, ки маоши миёнаи муҳоҷирони меҳнатӣ дар минтақаи мазкур тақрибан 30 ҳазор рублро ташкил медиҳад, ки нисфи онро ҳар як муҳоҷири меҳнатӣ барои зистан, пардохти патент, хӯрок ва ба дигар хароҷотҳо сарф менамояд.
