Ӯзбекистон: ҳоҷиён дар фурудгоҳ дастгир шуданд
Санаи 25-уми августи соли ҷорӣ дар фурудгоҳи шаҳри Тошканд 35 шаҳрванди Ӯзбекистон ки ба шаҳри Макка барои баҷо овардани ҳаҷ бидуни иҷозати Идораи Рӯҳонии Мусулмонони Ӯзбекистон аз тарафи ширкатҳои хусусӣ аз Аморати Муттаҳидаи Араб рафта буданд дастгир шуданд.
Яке аз ҳоҷиёни дастгир шудагон дар фурудгоҳи шаҳри Тошканд гуфт, ки кормандони хадамоти махсус ӯро дар хусуси «ҳамроҳи ки ба ҳаҷ рафтаанд, гурӯҳи ҳоҷиёнро ки роҳнамоӣ кардааст, ҳоҷиён барои сафари мазкур чанд қадар маблағ сарф намуданд ва дар хориҷа бо ки вохӯрданд» пурсиш намуданд, хабар медиҳад сомонаи centralasian.org.
Мо аз Дубай ба Тошканд санаи 28-уми август парвоз карда омадем. Дар фурудгоҳ кормандони Мақомоти Амнияти Давлат моро дастгир намуда, барои пурсиш ба утоқҳои ҷудогона дароварданд. Дар вақти пурсиш кормандони МАД моро бо ҷавони ришдор аз шаҳри Тошканд бо номи Даврон рӯбарӯкунӣ гузарониданд. Аз мо пурсиданд: «Ба ин ҷавон чанд қадар маблағ додаед?». Дар ин асно яке аз заноне, ки ҳамроҳи гурӯҳи мо омада буд ҷанҷол карда гуфт: «Ман 30 сол шудааст, ки навбати худро барои сафари ҳаҷ интизор будам, вале интизор шуда натавонистам. Мо дар онҷо кори хато анҷом надодаем». Моро дар фурудгоҳ 7 соат боздошта, шиносномаҳои моро гирифтанд. Сипас, раҳоӣ намуданд ва гуфтанд, ки шиносномаҳои худро пас аз гузаштани пурсиш дар шӯъбаи милиса баргардонида мегиред, — мегӯяд мусоҳиб.
Ёдрас мекунем, ки тибқи қонуни дар санаи 7-уми июни соли 2017 қабул шуда аз тарафи Кумитаи оид ба корҳои динии Ӯзбекистон, ба сокинони маҳаллӣ бидуни иҷозати Идораи Рӯҳонии Мусулмонони Ӯзбекистон сафар намудан ба Ҳаҷ ва Умра бо ширкатҳои хусусӣ манъ шудааст. Яке аз ҳоҷиёни дастгир шуда дар фурудгоҳи шаҳри Тошканд иброз намуд, ки сафар намудан ба шаҳри Макка аз тарафи Идораи Рӯҳонии Мусулмонони Ӯзбекистон «хеле мушкил ва гарон» мебошад.
Сафари Ҳаҷ аз ҷониби Идораи Рӯҳонии Мусулмонони Ӯзбекистон монополия карда шудааст. Дар кишвар мусулмонҳое ҳастанд, ки навбати худро интизоранд, вале то ҳол ба шаҳри Макка сафар карда натавонистанд. Дуюм, аз ҷониби Идораи Рӯҳонии Мусулмонони Ӯзбекистон ба Арабистони Саудӣ сафар кардан хеле гарон аст — 4 ҳазор доллар. Ширкатҳои хусусӣ дар Дубай сафари ҳаҷро ба маблағи 3 ҳазор доллар таклиф менамоянд. Шароите, ки онҳо ба мусулмонон муҳайё мекунанд назар ба шароити муҳайё кардаи ИРМӮ беҳтар мебошад, — иттило дод ӯ ба хабарнигорон.
