Ҷасадҳои муҳоҷирон аз Русия ба Тоҷикистон ирсол гардиданд
Сафири Тоҷикистон дар Русия Имомуддин Сатторов ба хабарнигорон гуфт, ки рӯзи 16-уми июн як нақлиёти вижа бо 50 ҷасади муҳоҷирони меҳнатии тоҷик, ки дар минтақаҳои гуногуни Русия фавтидаанд, аз Русия ба Тоҷикистон ба роҳ баромад.
«Инҳо шаҳрвандони мо аз шаҳри Москва ва вилояти Москва, Санкт-Петербург, вилояти Владимир, Уфа, Хабаровск, вилояти Рязань, Новосибирск ва дигар минтақаҳо мебошанд. Мо ба ҳамватаноне, ки дар ин кори хайр бо сафоратхона ҳамкорӣ карданд, миннатдории худро баён мекунем, ки дар натиҷа 50 ҷасади ҳамватанони мо ба ватан фиристода шуд», — қайд намуд Сатторов.
Инчунин хабарнигорон дар сафоратхона муайян карданд, ки тамоми хароҷоти интиқоли ҷасадҳоро як тоҷири тоҷик, ки тасмим гирифтааст номаш ифшо нагардад, пардохт кардааст.
Бояд қайд кард, ки интиқоли як ҷасад тавассути ҳавопаймо ба ҳисоби миёна 70 ҳазор рубли русиро ташкил медиҳад. Чанд сол қабл ҳукумати Тоҷикистон ба ширкатҳои ҳавопаймоии Тоҷикистон фармуда буд, ки борҳои «200» — ро ба таври ройгон интиқол диҳанд, аммо айни замон бахши тоҷикии сомонаҳои иҷтимоӣ Тоҷикистон бо дархостҳо оиди расонидани кӯмаки моддӣ барои интиқоли ҷасади муҳоҷири дигари тоҷик пур шудааст.
