ҶТ: Куҷост кӯмаки башардӯстона аз 58 кишвар?
Аз аввали соли ҷорӣ ба Тоҷикистон беш аз 24,8 ҳазор тонна кӯмаки башардӯстона ворид шудааст. Ба кишвар аз 58 кишвари хориҷи наздику дур дар шакли маҳсулоти хӯрокворӣ, доруворӣ ва дигар лавозимоти тиббӣ кӯмак ворид гардид. Дар ин бора хабаргузории Авесто хабар медиҳад.
Бино ба иттилои хадамоти гумруки Тоҷикистон, тайи даҳ моҳи ахир ба кишвар аз кишварҳои кӯмаккунанда ба маблағи 82 миллиону 550,7 ҳазор доллар кӯмаки башардӯстона ворид шудааст, ки нисбат ба як соли қабл тақрибан ду баробар зиёд аст. Кӯмаки башардӯстона дар соли гузашта ба маблағи беш аз 41 миллион доллар арзёбӣ шудааст, ҳамчунин гуфта мешавад, ки ба кишвар орд, равғани растанӣ, доруворӣ, заруротҳои тиббӣ, маҳсулоти хӯрокворӣ ва ғайра ворид шудааст.
Қобили зикр аст, ки соли гузашта ҳукумати Тоҷикистон дар робита бо густариши бемории Ковид-19 аз ниҳодҳои молии байналмилалӣ даъват карда буд, ки барои мубориза бо ин вирус кӯмак кунанд. Дар навбати худ кишварҳои донор ва ниҳодҳои байналмилалии молӣ ба ҷудо кардани захираҳои молӣ ва моддӣ ба Тоҷикистон шурӯъ карданд. Ҳамин тариқ, дар соли ҷорӣ ба кишвар 422,5 миллион доллар ҷудо карда шуд, ки аз он 189,5 миллион долларро ХБА ҷудо кардааст.
Аммо дар мавриди истифодаи мақсаднок ва одилона тақсим кардани кӯмаки башардӯстона миёни аҳолӣ шубҳаҳои асоснок вуҷуд дорад. Масалан, як сол пеш дар марҳилаи шадиди сирояти коронавирус шабакаҳои телевизионии Тоҷикистон бо тақсими кӯмакҳои башардӯстонаи хориҷӣ аз номи президент Раҳмон наворҳои видеоӣ намоиш доданд. Ҳамзамон, дар ярмаркаҳо фурӯши маводи кӯмаки башардӯстона сабт шудааст, дар миёни доруворӣ ва лавозимоти тиббие, ки аз номи Гурӯҳи Авесто тақсим карда шуда буд, кӯмакҳо бо нишони давлати Чин дида мешуд. Ҳамчунин, бо вуҷуди дарёфти доруҳо дар кишвар, сокинони ба вирус мубтало шуда маҷбур мешаванд, ки барои табобат аз ҷайби худ маблағ пардохт кунанд.
