Криптофермаҳои чинӣ дар Тоҷикистон
Ширкати Ҳонконги Lion Group Holding Ltd якҷоя бо ширкати Hong Kong New Full Rich Ltd рӯзи 18-уми ноябр созишномаеро имзо карданд, ки дар он нияти иҷрои тарҳи муштараки нақшаи майнинг дар Тоҷикистонро баён доштанд. Дар ин бора нашрияи интернетии StreetInsider.com хабар медиҳад.
Нашрия ҳамчунин хабар медиҳад, ки ҳукумати Тоҷикистон, аз ҷумла дастгоҳи иҷроияи раисиҷумҳур ва 12 вазорату идораҳои ҳукуматӣ аллакай ба ширкати Ganj Technology иҷоза додааст, ки дар яке аз минтақаҳои озоди иқтисодии кишвар як хоҷагии бузурги криптоферма таъсис диҳад.
Бояд қайд кард, ки истихроҷи криптоасъорҳо таъминоти бефосилаи барқро талаб мекунад ва бо истифода аз компютерҳои пуриқтидор, ки миқдори зиёди нерӯи барқро дар миқёси саноатӣ истеъмол мекунанд, амалӣ карда мешавад.
Қобили зикр аст, ки дар Тоҷикистон солҳост, ки дар фасли зимистон маҳдудияти интиқоли нерӯи барқ ба аҳолӣ вуҷуд дорад. Сокинони кишвар маҷбуранд бо ангишт, ҳезум ва таппак хонаҳои худро гарм бикунанд. Дар ҳамин ҳол, бо вуҷуди маҳдудиятҳои ҷорӣ дар кишвар, ҳукумати Тоҷикистон содироти нерӯи барқро ба кишварҳои ҳамсоя идома медиҳад. Ҳамин тавр, рӯзи 16 ноябр хабаргузории «Авесто» навишт, ки мақомоти Тоҷикистон дар 9 моҳи соли ҷорӣ аз интиқоли нерӯи барқ ба кишварҳои ҳамсоя беш аз 91,2 миллион доллар фоида ба даст овардааст, ки нисбат ба ҳамин давраи соли 2020 қариб 2 баробар зиёд аст. «Хабарҳо» аз манобеи худ маълум кардааст, ки дар ин ҳафта дар баъзе маҳаллаҳои пойтахт оид ба сарфакорона истифода бурдани неруи барқ чамъомадҳо барпо гардида, сокинонро барои захира кардани ангишт барои зимистон огоҳ кардаанд, зеро рӯзҳои наздик шояд дар пойтахт лимити интиқоли нерӯи барқ ҷорӣ шавад ва дар бархе аз навоҳии пойтахт аллакай шабона барқ қатъ шуда истодааст.
