Режими тоҷик блогнависони мустақилро боздошт мекунад
Режими тоҷик дар моҳҳои ахир аз болои рӯзноманигорон ва блогнависони мустақил фишорро афзоиш додааст. Ҳамин тавр, рӯзи 4 июл чанд тан аз фаъолон дар сӯҳбат бо Озодӣ аз он изҳори нигаронӣ карданд, ки мақомоти интизомӣ бидуни пешниҳоди ягон қарори қонунии мақомот телефонҳои мобилии онҳоро барои тафтиш мусодира кардаанд. Қаблан, дар моҳи июн, собиқ блогнавис ва рӯзноманигорони мустақил Далери Эмомалӣ ва Абдуллои Ғурбатӣ, ки ба ӯ ҳамчун наворбардор кӯмак мекард, боздошт шуда буданд.
Онҳо дар шабакаи Youtube-и Далери Эмомалӣ гузоришҳо дар бораи мушкилоти ҷомеа ва матолиби ифшои марбут ба мансабдорон нашр мекарданд. Дар ҳоли ҳозир алайҳи ҳарду парвандаи ҷиноӣ боз шудааст. Далери Эмомалӣ бо қисми 1 моддаи 259, қисми 2 моддаи 346 ва қисми 2 банди 3 моддаи 307 Кодекси ҷиноятии Ҷумҳурии Тоҷикистон айбдор дониста мешавад.
Нисбати Абдуллои Ғурбатӣ Додситонии ноҳияи Шоҳмансур тибқи қисми 1 моддаи 328 Кодекси ҷиноятии Ҷумҳурии Тоҷикистон (истифодаи зӯроварӣ нисбати намояндаи давлат) парванда боз карда шудааст.
Шариф Қурбонзода, намояндаи Додситонии кулли Тоҷикистон, рӯзи 15 июл дар нишасти матбуотӣ дар Душанбе аз сарнавишти боз ду хабарнигор ва блогнависи мустақил — Завқибек Саидаминӣ ва Абдусаттор Пирмуҳаммадзода хабар дод. «Рӯзи 13 июл Раёсати тафтишотии Вазорати корҳои дохилии Тоҷикистон алайҳи Завқибек Саидаминӣ тибқи моддаи 307, қисми 2, банди 3 (Даъватҳои оммавӣ барои бо роҳи зӯроварӣ тағйир додани сохти конститутсионии Ҷумҳурии Тоҷикистон) парвандаи ҷиноӣ боз шуда, тафтишоти пешакӣ оғоз гардид», — гуфт Қурбонзода. Дар ҷараёни тафтишот иртиботи Завқибеки Саидаминӣ бо ҲНИТ ва «Гурӯҳи 24» муайян шудааст.
Шариф Қурбонзода ҳамчунин изҳор дошт, ки блогнавис Абдусаттор Пирмуҳаммадзода рӯзи 9 июл барои итоат накардан ба талаботи қонунии намояндагони полис боздошт шудааст. Ба гуфтаи ӯ, Пирмуҳаммадзода дар бинои ВКД дар шаҳри Ваҳдат қарор дошта, то 19 июл дар боздоштгоҳ боқӣ мемонад.
Яке аз наздикони Абдусаттор Пирмуҳаммадзода қаблан дар сӯҳбат бо Радиои Озодӣ гуфта буд, ки маъмурони интизомӣ телефони дастӣ ва кортҳои бонкии рӯзноманигорро мусодира кардаанд. «Аз шӯъбаи ВКД ба ӯ занг зада гуфтанд, ки телефони дастӣ ва кортҳои бонкиро аз шӯъба гирифта метавонад. Ӯ рӯзи 9 июл вориди бинои полиси шаҳр шуд ва аз он замон то ҳол бедарак мебошад», — гуфт ӯ.
Блогнавис Завқибек Саидаминиро рӯзи 8 июл дар Душанбе дар назди яке аз нуқтаи мошиншӯй боздошт ва ба шаҳри Ваҳдат бурданд. Кормандони собиқи Радио ва Телевизиони Тоҷикистон Завқибек Саидаминӣ ва Абдусаттор Пирмуҳаммадзода солҳои охир бо блогнависӣ машғул буданд. Дар нашрияҳои худ аксаран режими кунуниро зери танқид қарор медоданд.
