Департаменти давлатии ИМА вориси Раҳмонро эълон кард
Департаменти давлатии Амрико дар гузориши солонаи худ дар бораи вазъи ҳуқуқи башар дар кишварҳои мухталифи ҷаҳон писари калонии раисиҷумҳури Тоҷикистон Эмомалӣ Раҳмон Рустами Эмомалиро вориси падараш номид.
Муаллифони гузориш қайд карданд, ки Рустами Эмомалӣ, шаҳрдори Душанбе, ки дар моҳи апрели соли 2020 раиси Маҷлиси Миллӣ шуд, амалан ба шахси дувуми ҷумҳурӣ ва вориси тахти падар табдил ёфт.
Департаменти давлатии Амрико Тоҷикистонро як давлати худкома медонад, ки беш аз 30 сол таҳти раҳбарии Эмомалӣ Раҳмон аст ва қудратро дар дасти худ мутамарказ кардааст. «Дар ҳоле ки Қонуни асосӣ низоми бисёрҳизбиро дар Тоҷикистон иҷоза дода, вале ҳукумат аз аввал монеи плюрализм ё гуногунандешии сиёсист», — омадааст дар гузориш.
Дар тӯли чанд даҳсола аст, ки Ғарб таҳти сарварии ИМА кишварҳои Осиёи Марказиро ба авторитаризм ва нақзи ҳуқуқи башар дар тамоми бахшҳои ҳаёт муттаҳам мекунад, ки ин ба ҳеҷ ваҷҳ кишварҳои ғарбиро аз дастгирӣ, таҳким ва маблағгузорӣ кардани ин режимҳо монеъ намешавад, махсусан вақтҳои охир.
Дар навбати худ мақомоти Тоҷикистон аз гузориши департаменти давлатии ИМА интиқод карда, гуфтанд, ки он дорои хусусияти сиёсӣ аст. Душанбе муътақид аст, ки дар ин гузориш «таҳлили объективии вазъи кунунии ҳуқуқи башар дар кишвар мушоҳида нашудааст» ва гузоришгарон асосан ба «маълумоти манобеъи манфиатдор такя мекунанд, ки эътимоднокии маълумоти нашршударо зери шубҳа мегузорад».
