Русия 2024: рейдҳои муштараки полис ва скинхедҳо
Дар Русия рейдҳои зиддимигрантӣ, ки бо бераҳмии махсус аз тарафи кормандони мақомоти ҳифзи ҳуқуқ ва намояндагони созмонҳои миллатгаро ҳамроҳ мешаванд, идома доранд. Номуайян аст, ки дар асоси кадом ҳуқуқ намояндагони ин созмонҳо дар ин чорабиниҳо иштирок мекунанд. Расонаҳо аз ду чунин рейд дар чанд рӯзи охир хабар медиҳанд.
Яке аз рейдҳо дар анборҳои «Детский мир» дар шаҳри Наро-Фомински вилояти Москва баргузор шуд. Муҳоҷирони меҳнатӣ хабар доданд, ки дар ин рейд на танҳо кормандони полис ва Росгвардия, балки намояндагони созмони миллатгарои «Ҷамъияти рус» низ иштирок доштанд. Дар рафти чорабиниҳо садҳо муҳоҷири меҳнатӣ аз Осиёи Марказӣ таҳқир ва таҳдид шуданд. «Ин ҳақорат ва масхара буд. Мегуфтанд, ки нишинед, хезед, нишинед, хезед. Ҳамаи ин одамон ҳуҷҷат доштанд. Онҳоеро, ки ҳуҷҷат надоштанд, бо автобус бурданд», — гуфт мусоҳиби лоиҳаи «Мигрант Медиа».
Мақомоти ҳифзи ҳуқуқ ва созмонҳои миллатгаро дар он вақт ба рейд оғоз карданд, ки, ба гуфтаи мусоҳиби мо, ҳама дар кор буданд. «Гуфтанд, ки ин тафтиш аст. Ҳамаи моро маҷбур карданд ҷойи кори худро тарк кунем ва дар як макон ҷамъ шавем. Барои онҳо фарқе надошт, ки рус аст ё муҳоҷир, ҳуҷҷатҳои ҳамаро тафтиш мекарданд. Агар шахс сокини маҳаллӣ бошад, озод мекарданд, вале ҳамаи муҳоҷиронро дар як гӯша ҷамъ мекарданд. Он ҷо намояндагони ВКД, Росгвардия, ОМОН ва «Ҷамъияти рус», тақрибан аз ҳамаи ниҳодҳои ҳукуматӣ иштирок доштанд. Тахминан соати 10 пагоҳӣ омада, то соати 16 мардумро дар кӯча нигоҳ доштанд. Касоне, ки ҳуҷҷат надоштанд ба мақомот бурданд. Боқимондагонро таҳқир намуданд ”, — мегӯянд шоҳидон.
Ҷолиби диққат аст, ки бузургтарин созмони миллатгаро дар Русия – «Ҷамъияти рус» – дар ҳоли касби нуфузи бештар аст ва ошкоро аз тарафи давлат дастгирӣ меёбад. Мушоҳидон ин созмонро ба олигархи православӣ Константин Малофеев рабт медиҳанд, ки ДНР ва ЛНР ва гурӯҳҳои ултрамиллӣ, ки дар амалиётҳои мусаллаҳона дар ҳудуди Украина иштирок доштанд, маблағгузорӣ мекард.
Ёдовар мешавем, ки чанд рӯз қабл мусалмони рус ва блогери маъруф Мансур Гнеев бо иттиҳоми барангехтани адовати қавмӣ дастгир шуд. Ӯ бо роҳбари «Ҷамъияти рус» Андрей Ткачук, ки мусулмононро «наҷосат» номида буд, дар баҳси оммавӣ ворид шуда буд. «Ин як марши ҳақиқии ватандӯстони кишвар аст, ки бо Худо дар дил ва муҳаббат ба давлати худ, инчунин барои пирӯзии лашкари мо дар амалиёти махсус ва ҳифзи кишвар аз наҷосати мусалмонӣ бо дуо баромаданд«, — изҳор дошта буд миллатгаро дар моҳи сентябр. Бо дарназардошти он, ки блогери мусалмон пушти панҷара қарор гирифт, равшан шуд, ки ҳукумати Русия дар охир дар кадом ҷониби ин ихтилоф истодааст. Воқеан мавқеи ҳукумати Русия барои касе ногаҳонӣ набуд, зеро қабл аз он изҳороти шабеҳро аъзои Шӯрои ҳуқуқи инсони назди президенти Федератсияи Русия Кирилл Кабанов низ изҳор дошта буд. «Майдон баста шуд. Маълум шуд, ки маҳз кӯчиши миллионҳо мусалмонон ва радикализатсияи як қисмати ҷомеаи мо ба афзоиши ҳалокунонӣ дар иқтисод оварда расонид«, — гуфт ӯ.
