Плюс 5 доллар: дар Тоҷикистон нафақа баланд шуд

Аз 1-уми сентябри соли 2025 нафақаҳо дар Тоҷикистон 10% зиёд карда шуданд. Дар кишвар се навъи нафақа мавҷуд аст: нафақаи меҳнатӣ, нафақаи суғуртавӣ ва нафақаи иҷтимоӣ. То қабули қонуни зиёд кардани нафақаҳо, ҳаҷми миёнаи онҳо чунин буд:

• нафақаи меҳнатӣ — 446,88 сомонӣ ($47,65),
• нафақаи суғуртавӣ — 363,98 сомонӣ ($38,81),
• нафақаи иҷтимоӣ — 262,64 сомонӣ ($28,00).

Барои он ки ба ин “зиёдшавӣ”-и нафақаҳо баҳо диҳем ва дарк кунем, ки оё ин воқеан индексатсия бо назардошти таваррум аст ё танҳо як қадами зоҳирӣ барои нишон додани “ғамхорӣ” нисбат ба аҳолӣ, кофӣ аст, ки нархи маҳсулоти асосии истеъмолиро муқоиса намоем. Ҳамин тавр, дар соли 2015 нархи маҳсулоти сабади истеъмолӣ чунин буд:

1. Орд: 2,4–2,8 сомонӣ барои 1 кг

2. Равғани растанӣ: 4–6 сомонӣ барои 1 литр

3. Шакар: 2,5–3 сомонӣ барои 1 кг

4. Биринҷ: 4–6 сомонӣ барои 1 кг

5. Тухм: 2,5–3 сомонӣ барои 10 дона

6. Гӯшт: 35–40 сомонӣ барои 1 кг

7. Шир: 3–3,5 сомонӣ барои 1 литр

Дар соли 2025 бошад, нархҳо чунин шудаанд:

1. Орд: 9–10,5 сомонӣ барои 1 кг

2. Равғани растанӣ: 18–20 сомонӣ барои 1 литр

3. Шакар: 8–8,5 сомонӣ барои 1 кг

4. Биринҷ: 14–20 сомонӣ барои 1 кг

5. Тухм: 12–14 сомонӣ барои 10 дона

6. Гӯшт: 85–100 сомонӣ барои 1 кг

7. Шир: 8–10 сомонӣ барои 1 литр

Аён мешавад, ки нархи ҳамаи маҳсулотҳо 2–3 маротиба боло рафтааст, ва чунин афзоиши ночизи нафақа ҳамагӣ 5 доллар, албатта, вазъиятро беҳтар намекунад: бо чунин нафақа зиндагӣ кардан номумкин аст, махсусан барои шахси солхӯрда, бо дарназардошти хароҷот ба доруҳои гаронқимат, ки дар Тоҷикистон нафақахӯрон маҷбуранд бо маблағи худ харидорӣ менамоянд.