Талабагони тоҷикро ба ҷамъкунии қоғазкӯҳна ва оҳанпора рои намуданд
Дар ноҳияи Рашти Ҷумҳурии Тоҷикистон ҳукумат қарор намуд, ки талабагон ва волидайнро барои ҷамъоварии маблағ ба ҳисоби пардози қарзи китобҳои дарсӣ бо роҳи ҷамъоварии чормағз, хуч, қоғазкӯҳна ва оҳанпора ҷалб намояд. Дар ин хусус ба хабарнигорон раиси шӯъбаи маъорифи ноҳияи Рашт Зарина Идиева хабар дод.
«Вазири маориф ба мо маслиҳат дод, ки кӯдаконро ба ҷамъоварии пахта ё ин ки ҷамъоварии ҳосили картошка рои кунем. Мо ҷавобан гуфтаем, ки ин кор имконнопазир аст. Зеро, хоҷагие, ки картошкаро парвариш намудааст, бо қувваи худ ҳосилашро ҷамъ менамояд. Он гоҳ ӯ ба мо маслиҳат дод, ки хуч ва чормағз ҷамъоварӣ намоем», иброз намуд Идиева.
Қарзи умумии мактабҳои ноҳияи Рашт аз иҷораи китобҳои дарсӣ тақрибан 500 млн сомониро ташкил мекунад.
Вазорати маориф ва фанни Тоҷикистон ба мактабҳо китобҳои дарсиро ба мӯҳлати се сол иҷора медиҳад. Чи тавре, ки дар хадамот маълумот додаанд, соли якум аз тарафи мактаб 34 % (фоиз) пардохт карда мешавад, соли дуюм ва сеюм бошад 33 % (фоиз) аз нархи китоб пардохт карда мешавад.
Умуман дар кишваре, ки таҳсилоти миёнаи мактаб маҷбурист, бояд аз тарафи давлат маблағгузори карда шавад. Гарчанде ки Васоити Ахбори Омма дар хусуси кушодашавии мактаби нав аз тарафи худи «пешвои миллат» бонг мезанад, вале вазъият дар системаи маориф хеле ғамгин мебошад. Ҳамин тавр, дар деҳаи Танёли ҷамоъати Даҳанаи шаҳри Кӯлоб, ки 1000 нафар зиндагӣ ба сар мебаранд, зиёда аз 100 талабагони мактаб дар ошёнаи якуми хонаи шахсӣ таҳсилот мегиранд. Истиқоматкунандагони маҳаллӣ шикоят карда мегӯянд, ки 20 сол инҷониб барои сохтани мактаб ба фарзандонашон аз тарафи ҳукумат иҷозат дода намешавад.
Раиси деҳаи Танёл Бозоралӣ Сафаров санаи 22-уми октябр дар ҳамсӯҳбат бо радиои Озодӣ гуфт, ки бо ваъдаҳои хушку-холӣ кор аз ҷояш намеҷумбад. «Ба ҳама ҷо муроҷиат кардем, намедонам чаро муроҷиати моро касе намешунавад. Оё фарзандони мо навъи дуюманд?», мегӯяд ӯ. Ба гуфтаи муаллимаи мактаб Нурҷон Қосимова пештар бинои мазкур барои фермерон бошишгоҳи зироаткори ба ҳисоб мерафт, аз соли 1991 шурӯъ намуда бинои мазкур ҳамчун мактаб истифода бурда мешавад. «Баъзан соҳиби манзили зист мепурсад, ки сохтумони мактаби нав каӣ шурӯъ мешаваду мо аз ин ҷо мекӯчем. Ҳоло кӯдакҳояш хурданд, бинобарин моро тоқат мекунад», гуфт ӯ.
