Тоҷикистон бо “Исроил” созишнома имзо кард

Исроил ва Тоҷикистон Созишнома оид ба ҳамкорӣ дар соҳаи рушди сайёҳӣ ва сармоягузориро ба имзо расониданд. Дар ин бора нашрияи Yeni Şafak бо истинод ба ВАО-и исроилӣ хабар дод.

Дар ҷараёни сафари расмӣ ба Душанбе, вазири сайёҳии Исроил Ҳайм Катс ва раиси Кумитаи рушди сайёҳии Тоҷикистон Ҷамшед Ҷумахонзода Созишномаи тафоҳумро байни ду кишвар ба имзо расониданд, ки ҳадаф аз он рушд додани робитаҳои иқтисодӣ ва ҳамкорӣ дар бахши сайёҳӣ мебошад.

Созишнома дар доираи Форуми СММ оид ба сармоягузорӣ ба сайёҳӣ, ки бо ибтикори ҳукумати Тоҷикистон ва дастгирии Созмони ҷаҳонии сайёҳӣ ташкил шуд, ба имзо расидааст. Ҳамзамон гузориш дода мешавад, ки дар форум ҳайати исроилӣ «модели исроилии ташвиқи сармоягузорӣ ба сайёҳӣ»-ро муаррифӣ кардааст.

Ёдовар мешавем, ки тайи қариб ду сол боз марҳилаи нав, вале бесобиқа аз рӯи миқёси шумораи қурбониён ва қатли ом алайҳи мусалмонони Фаластин идома дорад. Дар ин муддат қувваҳои мусаллаҳи исроилӣ бо пуштибонии комили кишварҳои Ғарб на камтар аз 80 000 сокини осоиштаро кушта, тақрибан 150 000 нафарро сахт маҷрӯҳ карданд ва беш аз 88% инфрасохтори қаламравро дар натиҷаи партофтани 125 ҳазор тонна маводи тарканда нобуд карданд.

Коршиносон таъкид мекунанд, ки одатан режимҳои кишварҳои мусалмон дар чунин шароит кӯшиш мекунанд аз тамосҳои ошкоро бо “Исроил” худдорӣ кунанд ва бастани созишномаҳои гуногунро ба таъхир гузоранд, то хашми мардумашонро ба вуҷуд наоранд. Зеро ҳар гуна созиш бо ташкилоти ишғолгар на танҳо пуштибонӣ аз қатли омми ҳамдинонро ифода мекунад, балки ба таври ғайримустақим эътирофи давлатеро низ маъно дорад, ки комилан дар заминҳои мусалмонон ҷойгир шудааст. Аммо, ба назар мерасад, ки ҳукумати Тоҷикистон ба чунин “ҷузъиёти хурд”, мисли андешаи мардуми худ, чандон таваҷҷуҳ намекунад.