Мубашшир Аҳмад ба зиндон маҳкум шуд

Додгоҳи ҷиноии ноҳияи Учтеппаи шаҳри Тошканд дар ҷаласаи рӯзи 8 октябр нисбат ба воизи динӣ Алишер Турсунов, ки бо тахаллуси Мубашшир Аҳмад маъруф аст, ҳукм содир кард. Дар ин бора котиби матбуотии Додгоҳи олии Ӯзбекистон Азиз Абидов иттилоъ дод.

Воизи динӣ ва блогер Алишер Турсунов, маъруф ба номи Мубашшир Аҳмад, ба мӯҳлати 2 солу 6 моҳ аз озодӣ маҳрум гардид. Ӯ бар асоси се моддаи Кодекси ҷиноятии Ӯзбекистон гунаҳгор дониста шудааст, аз ҷумла барои барангехтани адовати динӣ ва паҳнкунии ғайриқонунии маводҳои динӣ.

Қаблан, рӯзи 18 сентябр, муовини прокурори ноҳияи Учтеппа Эркин Нарзуллоев талаб карда буд, ки барои Турсунов ҷазо дар шакли 7 соли зиндон ва ҷарима ба андозаи 150 воҳиди ҳисобӣ таъин карда шавад.

Содир шудани ҳукми ниҳоӣ се маротиба ба таъхир афтод: аз 22 сентябр ба 29 сентябр, сипас аз 29 сентябр ба 2 октябр ва баъдан ҷаласа ба 8 октябр таъин гардид. Ҳамчунин, додгоҳ қарор кард, ки саҳифаҳо ва шабакаҳои Мубашшир Аҳмад дар Facebook, Instagram, Telegram ва YouTube баста шаванд.

Ёдовар мешавем, ки Мубашшир Аҳмад моҳи майи соли ҷорӣ аз ҷониби мақомоти ҳифзи ҳуқуқи Туркия боздошт шуда, ба таври фаврӣ ба Ӯзбекистон истирдод гардид. Таҳлилгарон истирдоди ӯро бо суханрониҳои пайдарпайи ӯ дар муддати охир дар танқиди Исроил ва Чин ба ҷонибдории мусалмонони мазлум, инчунин бетарафии ҳукуматҳои кишварҳои мусалмон рабт медиҳанд.

Коршиносон бар ин назаранд, ки таъини мӯҳлати нисбатан кӯтоҳи зиндон метавонад ба сабаби вокуниши густурдаи ҷомеа ба боздошти ин рӯҳонии маъруф бошад, зеро Мирзиёев, бар хилофи пешгузаштаи худ, то андозае ба симои сиёсӣ ва обрӯи худ аҳамият медиҳад.