Масҷидҳо баста шаванд: Путин ба Душанбе меояд

Аз 7 то 12 октябр дар тамоми масҷидҳои бузурги шаҳри Душанбе адои намозҳои ҷамоатӣ муваққатан боздошта шуд. Ба иттилои Раёсати корҳои дохилии пойтахт, ин маҳдудиятҳо «ба хотири баргузории чорабиниҳои муҳими давлатӣ» ҷорӣ гардидаанд, ки зери он сафари расмии президенти Русия Владимир Путин дар доираи ҳамоиши Иттиҳоди Давлатҳои Мустақил фаҳмида мешавад. Намозҳои ҷамоатӣ муваққатан дар масҷидҳои «Мавлоно Яъқуби Чархӣ», «Сари Осиё», «Абу Ҳанифа» ва «Хоҷӣ Исматулло» баргузор намешаванд. Илова бар ин, аз 8 то 12 октябр намозҳои ҷамоатӣ дар масҷиди ба номи «Имом Бухорӣ» низ баргузор нахоҳанд шуд.

Ёдовар мешавем, ки бастани масоҷид ҳангоми баргузории чунин чорабиниҳо кайҳо боз ба як амали маъмулӣ дар низоми ҳокимияти Тоҷикистон табдил ёфтааст. Масалан, дар моҳи июли соли 2024 дар Душанбе ба сабаби сафари давлатии раисиҷумҳури Чин Си Ҷинпин намози ҷумъа бекор карда шуда буд. Эҳтимолан, Эмомалӣ Раҳмон бо чунин иқдомҳо мехоҳад ба роҳбарони хориҷӣ Тоҷикистонро ҳамчун кишвари «аз Ислом пок» нишон диҳад — яъне ҳамон тавре ки онҳо онро дидан мехоҳанд.

Қобили зикр аст, ки чанде пеш аз сафари Путин ба Душанбе вазири дифои Русия Андрей Белоусов низ вориди пойтахти Тоҷикистон шуд. Ӯ аз иншооти низомии Вазорати дифои Русия, ки дар ҳудуди Тоҷикистон ҷойгиранд, боздид ба амал овард. Тибқи маълумоти расмӣ, пойгоҳи низомии 201-уми Русия, ки дар Тоҷикистон мустақар аст, бузургтарин пойгоҳи низомии Русия берун аз марзи он ба ҳисоб меравад. Ин пойгоҳ дар ду шаҳр — Душанбе ва Бохтар ҷойгир буда, аз воҳидҳои мотосавор, тонкӣ, иктишофӣ, мудофиаи зиддиҳавоӣ, ҳимояи радиатсионӣ, кимиёӣ ва биологӣ, ҳамчунин алоқа иборат аст. Дар маҷмӯъ, шумораи низомиёни рус дар Тоҷикистон тақрибан 10 000 нафарро ташкил медиҳад.