КДАМ 4 ҳазор донишҷӯро аз хориҷ бозгардонд

Мақомоти Тоҷикистон беш аз 4 ҳазор донишҷӯро аз кишварҳои хориҷӣ ба ватан баргардондаанд. Ба гуфтаи раиси Кумитаи давлатии амнияти миллӣ Саймумин Ятимов, ин иқдом бо баҳонаи пешгирӣ аз шомилшавии ҷавонон ба созмонҳои террористӣ сурат гирифтааст. Ӯ зимни як ҳамоиш дар Душанбе изҳор дошт, ки ин ҷавонон дар муассисаҳои таълимии хориҷӣ таҳсил мекарданд ва зери таъсири идеологӣ ва таблиғоти гурӯҳҳои ифротӣ ва муассисаҳои динии шубҳанок қарор гирифта буданд. «Бо мақсади пешгирӣ аз ҷалби онҳо ба гурӯҳҳои террористӣ, беш аз 4 ҳазор донишҷӯи тоҷик, ки мавриди таъсир ва коркарди ташкилотҳои террористӣ ва муассисаҳои динии хориҷӣ қарор доштанд, ба ватан бозгардонда шуданд», — таъкид кард Ятимов.

     Зимнан, бояд гуфт, ки ҳукумати Тоҷикистон тайи тақрибан понздаҳ сол аст, ки таҳсили динии ҷавонони кишварро сахт зери назорат гирифтааст. Оғози ин сиёсати фишоровар ба соли 2009 бармегардад, вақте ки он сол “Соли Имом Аъзам Абу Ҳанифа” эълон гардид. Зери шиори “ҳифзи мазҳаби ҳанафӣ” бар зидди донишҷӯёни муассисаҳои динии хориҷӣ мавҷи таъқибу фишор оғоз ёфт. Дар тӯли чанд сол ҳамаи муассисаҳои динии дохили кишвар баста шуданд, ба ҷуз аз Донишгоҳи исломии Душанбе, ки он ҳам пурра таҳти назорати давлат қарор гирифт.

     Аз ҳамон вақт гирифтани таҳсили динӣ танҳо дар муассисаҳои расмӣ ва бо иҷозати падару модар иҷозат дода мешавад. Ҳоло танҳо Донишгоҳи исломии Душанбе ҳамчун муассисаи фаъол боқӣ мондааст, ки шумораи донишҷӯёнаш хеле маҳдуд аст. Дар натиҷа кишвар бо камбуди шадиди кадрҳои динӣ рӯбарӯ гаштааст. Аксари уламову рӯҳониёни мустақил ва афроди соҳиби илми дин ё кишварро тарк кардаанд, ё бо парвандаҳои сохта ба зиндон маҳкум шудаанд. Боқимондаҳо бошад зери назорати шадиди ниҳодҳои амниятӣ қарор доранд.

    Таҳлилгарон мегӯянд, яке аз сутунҳои асосии сиёсати дохилии ҳукумати Раҳмон пешгирӣ аз эҳёи сиёсиву динии ҷомеа аст — чи тавре, ки дар солҳои 90 рух дода буд. Ба назар мерасад, ки ҳатто пас аз рафтани эҳтимолии Раҳмон аз қудрат низ, ин сиёсат тағйир нахоҳад ёфт, бо таваҷҷуҳ ба изҳорот ва мавқеи вориси ӯ. Ёдовар мешавем, ки моҳи август раиси шаҳри Душанбе ва раиси Маҷлиси миллии Маҷлиси Олии ҶТ — Рустами Эмомалӣ — зимни мулоқот бо мақомоти ҳифзи ҳуқуқ ва додгоҳи пойтахт аз “муаммои таҳсили ғайриқонунии динӣ” изҳори нигаронӣ карда, гуфта буд: «80 дарсади афроде, ки таҳсили ғайриқонунии динӣ гирифтаанд, ҷавонони то 30-сола мебошанд».