Иттиҳоди Аврупо дар доираи бастаи 19-уми таҳримҳо алайҳи Русия маҳдудиятҳоеро ба муомилоти молиявӣ бо як қатор бонкҳои Қазоқистон, Қирғизистон ва Тоҷикистон ҷорӣ намуд. Ба рӯйхати таҳримшудагон, аз ҷумла, филиали Бонки русии ВТБ дар Қазоқистон, бонкҳои қирғизии «Толубай» ва «Бонки амонатгузории Авруосиё», инчунин бонкҳои тоҷикии «Душанбе Сити Бонк», «Спитамен» ва «Коммертсбонк» шомил шудаанд. Ҳар се бонки тоҷикии таҳримшуда бевосита бо хонаводаи Раҳмон алоқаманданд.
Бар асоси маълумоти манбаъҳои кушода ва Феҳристи давлатии ягонаи шахсони ҳуқуқии Тоҷикистон, соҳиби асосии «Душанбе Сити Бонк» ширкати «Авесто Групп» мебошад, ки тақрибан 70 дарсади саҳмияҳоро дар ихтиёр дорад. Сардори ин ширкат Мирзо Муҳаммад буда, яке аз афроди наздики писари президент, Рустами Эмомалӣ мебошад. Соҳиби «Коммертсбонки Тоҷикистон» бошад ширкати «Фароз» аст, ки ба Шамсулло Соҳибов, домоди президенти Тоҷикистон, тааллуқ дорад. Саҳмиядорони асосии «Спитаменбонк» бошад ширкати суғуртавии «Спитамен-Суғурта» мебошад. Ба гуфтаи манбаъҳо, қаблан ин бонк низ бо Ҷамолиддин Нуралиев — собиқ муовини аввали раиси Бонки миллии Тоҷикистон ва боз як домоди Раҳмон — иртибот дошт.
Ҷолиби диққат он аст, ки таҳримҳои нав пас аз сафари расмии ахири президенти Русия ба Тоҷикистон эълон шуданд — сафаре, ки дар он Эмомалӣ Раҳмон бо тамоми шукӯҳу намоишкорӣ аз Путин истиқбол гирифт, то муносибати вижаи худро бо Русия ва шахсан бо президент Путин таъкид намояд.
