Ӯзбекистон: имом-хатибон ба рӯзномаҳои давлатӣ обуна шудан маҷбур мекунанд
Дар масҷидҳои Ӯзбекистон бо фармони ҳукуматдорон имом-хатибон барои обуна гаштан дар рӯзномаҳои давлатӣ мардумро маҷбур менамоянд. Оиди ин мавзӯъ дар ҳамсӯҳбат бо Озодӣ сокини маҳаллӣ Шарифҷон хабар додааст.
«Моро маҷбур мекунанд, ки барои обуна гаштан ба рӯзномаҳое, ки касе онро намехонад 30-60 ҳазор сӯм (3-6 доллар) пардохт намоем. Ба гуфтаи имом, агар мо ба нашрияҳои мазкур обуна нагардем, масҷидамон баста мешавад», мегӯяд намозгузори масҷиди «Эски қовунчи»-и ноҳияи Янгийӯл.
Ғайр аз ин, ба гуфтаи ӯ намозгузорон маҷбур карда мешаванд, то китоби муфтии Ӯзбекистон Усмонхон Алимовро бихаранд. Китоби нави муфтӣ баромадааст ва аз мо талаб намуданд, ки онро харидори намоем.
“Мутмаинам, ки китоби мазкурро намехонам, вале чораи дигар надоштам ва онро харидори намудам. Дар мо одат шудааст, ки имомонро гӯш намоем. Бинобар ин ҳукумат бо воситаи имомон бо баҳонаҳои гуногун нашрияҳое, ки дар байни хонандагон шӯҳрат пайдо накардааст ба обуна гаштан маҷбур карда истодааст. Имомҳои мо масъулиятҳои асосии худро фаромӯш намуда ба хаткашон табдил ёфтаанд”, мегӯяд Шарифҷон.
Имоми яке аз масҷидҳои шаҳри Хива мегӯяд, ки Идораи рӯҳонии мусулмонони Ӯзбекистон фармон додааст, ки дар байни намозгузорон ташвиқот бубаранд, то ин ки ба нашрияҳои давлатӣ обуна гарданд.
«Мо бояд нақшаи обуна гаштанро ба миқдори 1 миллиону 300 ҳазор сӯм ($1600 доллар) ба итмом бирасонем. Бинобар ин аз намозгузорон маблағи зеринро ҷамъоварӣ намуда истодаем. Агар маблағи ҷамъкардаамон нокифоягӣ кунад, маблағе, ки аз садақот ба масҷидамон ҷамъ шудааст илова менамоем», гуфт имом-хатиби масҷиди шаҳри Хива.
Сиёсатмадорон бар он ақидаанд, ки бо услуби зерин ҳукумат кӯшиш дорад, то ин ки хараҷоти ташвиқоти худро аз кисаи сокинони кишвар бигирад.
