Раисҷумҳури Туркманистон боз китоб менависад
Чи тавре ки ОИ Фарғона такя ба сомонаи Turkmenportal иттилоъ медиҳад, раисҷумҳури Туркманистон Қурбонгули Бердимуҳамедов ба навиштани китоби навбатӣ шурӯъ намуд.
«Бердимуҳамедов бинои аспдавонии Ахалтекинро зиёрат намуд ва тибқи одати худ ба навиштани асари бадеӣ нишаст. Дар бораи ситоиши фасли баҳор, табиати Туркманистон, аспҳои зотӣ шеър навишт. Инчунин барои эҷод намудани китоби нав оиди урфу одат, таърихи бойи аспҳо ва хислатҳои одатии замини Туркманистон шурӯъ намуд. Дар эҷодиёти худ Бердимуҳамедов таърихи кишварро, Роҳи абрешим, ки дар қадим аз минтақаҳои Туркманистон мегузашт қайд намудааст», — менависад Turkmenportal.
Дар тӯли 10 соли ҳукмронии Бердимуҳамедов 42 китоб зери таҳти имзои раисҷумҳури Туркманистон нашр шудааст. Баромади ҳар як нашрияи ӯ аз тарафи телевизиони давлатӣ васеъ рӯшноӣ карда мешавад. Пешкаш намудани ҳар як нашрия дар давоми як сол чандин маротиба гузаронида мешавад.
Асари охирини Бердимуҳамедов бо номи «Омӯзиши Аркадағ» — асоси тандурустӣ ва рӯҳбаландӣ» моҳи марти соли ҷорӣ ба хонандагон тақдим карда шуд. Нашрияи мазкурро худи Бердимуҳамедов дар маҷлиси ҳукумат тақдим намуд ва як нусхагӣ ба вазирон тақсим кард.
Хоссатан дар китобҳои худ ӯ дар хусуси аспҳо, гилембофӣ ва хешовандонаш нақл намудааст. Бояд қайд намуд, ки асарҳои раисҷумҳур ва китобҳои дар бораи ӯ навишташуда дар мактабҳои миёна ба ҷои китоби «Руҳнома», ки аз ҷониби собиқ раисҷумҳури Туркманистон Сафармурод Ниёзов «Туркманбошӣ» навишта шудааст, омӯзонида мешавад.
Бояд қайд намуд, ки Бердимуҳамедов ягона ҳокими ҳукмраво дар минтақа ба ҳисоб намеравад, ки бо амалҳои ахмақонааш аҳолияшро ба ҳайрат меорад. Ҳамин тавр, ҳамкорони Осиёии ӯ дар мадҳ намудани худ ба мардум шарм намедоранд. Бинобар ин барои амалӣ намудани мақсади худ ҳамаи намуди услубу воситаҳоро ба кор дароварда, таблиғот дар ВАО-и маҳаллӣ, таблиғот дар ҷойҳо бо мансабдорон, ҷорӣ намудани мадҳи шахсияти раисҷумҳур дар системаи маориф ва ғайра татбиқ карда мешавад. Масалан, соли 2004 дар шаҳри Остона бо фармони раисҷумҳури Қазоқистон Назарбоев осорхона ба номи ӯ сохта шудааст, ки дар он нигораҳои гуногун ва китоби навиштаи ӯ дар 32 забони ҷаҳон тарҷума шудааст нигоҳубин карда мешавад. Мадҳ намудани шахсияти собиқ раисҷумҳури Ӯзбекистон Каримов бошад, пас аз вафоташ зинда буда, то ҳол идома ёфта истодааст: аз ҷониби ҳукумат қабри ӯ яке аз ҷойҳои муқаддас эълон гардид, инчунин бо номи ӯ масҷидҳо кушода мешаванд. Раисҷумҳури Тоҷикистон Раҳмон низ аз онҳо ақиб намемонад, дар донишгоҳҳо китобҳои ӯ ба мисли асарҳои бадеии замонавӣ омӯхта мешавад.
