Баталиони «Амир Темур»
Наворе бо суханронии раиси Ҷамъияти ӯзбекҳои Осиёи Марказӣ дар сарзамини Перм Ҷаҳонгир Ҷалолов дар сомонаҳои иҷтимоӣ пайдо гардид, ки дар он ӯ аз ӯзбекҳо даъват мекунад, барои ширкат дар ҷанги зидди Украина дар канори Русия як баталион таъсис дода шавад. Навори мазкур дар шабакаҳои иҷтимоӣ боиси сару садоҳои густарда ва вокунишҳои манфӣ аз тарафи корбарони интернетии Осиёи Марказӣ гардид.
«Эй дӯстон ман ба шумо муроҷиат мекунам. Фарзандони мо ба кӯдакистонҳо мераванд, дар мактабҳо, техникумҳо ва донишкадаҳои олӣ таҳсил мегиранд. Мо дар Русия кору зиндагӣ мекунем. Мо на танҳо бояд, балки вазифадорем нону намаки хӯрдаамонро сафед кунем. Пешниҳоди ман ин аст, ки як баталиони ихтиёриён таъсис дода, онро бо номи бузурги Амир Темур номида, амалиёти низомии махсуси Русияро барои безараргардонӣ ва денатсификатсияи Украинаро дастгирӣ кунем», — гуфт Ҷалолов.
Худи Ҷаҳонгир Ҷалолов дар саҳифаи ВК-и худ хабар додааст, ки пас аз пешниҳоди ӯ дар бораи таъсиси баталиони Амир Темур аз ҷониби ҳамватанонаш ба сӯи ӯ таҳдиду таҳқирҳо боридааст.
Илова бар ин, Агентии муҳоҷирати меҳнатии хориҷии Ӯзбекистон дар посух ба муроҷиати ходими ҷамъиятии пур аз муҳаббат ба Русия, барои таъсиси баталиони ихтиёриён ба ҷавобгарии ҷиноӣ кашида мешавад. Посухи мазкур дар сомонаи сафорати Ӯзбекистон дар Русия нашр шудааст. Раёсат ёдовар шуд, ки дар Ӯзбекистон зархаридӣ тибқи моддаи 154-уми қонун манъ шудааст: тибқи моддаи 154-и Кодекси ҷиноии Ӯзбекистон дар бораи зархаридӣ, иштирок дар амалиёти ҷангӣ дар қаламрави давлати дигар ё тарафи он, бо маҳрум сохтан аз озодӣ ба мўҳлати аз панҷ то даҳ сол ҷазо дода мешавад.
Ёдрас мекунем, ки аз оғози ҳамлаи Русия ба Украина, Москва барои ҷалби муҳоҷирон аз Осиёи Марказӣ талош карда, онҳоро бо ваъдаҳои додани шаҳрвандии Русия ва маоши баланд ҷалб мекунад. Бо вучуди ин, ба даъваткунандагон муяссар нашуд, ки дар ин бобат муваффақияти калон ба даст оранд.
