ТАСС акнун дар Туркманистон
9 август дар Туркманистон намояндагии оҷонсии ТАСС ифтитоҳ гардид. Дар ин бора рӯзи 12 август дар брифинг муовини директори департаменти иттилоот ва матбуоти Вазорати корҳои хориҷии Русия Иван Нечаев хабар дод.
«Мо умедворем, ки ифтитоҳи намояндагии ТАСС дар Туркманистон ба огоҳии бештари хонандагони рус, туркман, инчунин хонандагони хориҷӣ аз ҳаёти сиёсӣ, иқтисодӣ, фарҳангӣ, илмӣ, варзишии кишвари дӯстамон, аз ҳамкориҳои кишварҳоямон дар арсаи байналхалкӣ мусоидат хоҳад кард», — гуфт Нечаев.
Қаблан, дар охирҳои моҳи май расонаҳои русӣ дар бораи қатъи пахши бархе аз шабакаҳои телевизионии Русия дар қаламрави кишварҳои Осиёи Марказӣ хабар дода, инро як навъи дур кардани ин кишварҳо аз Кремл муаррифӣ карданд. Аммо ба зудӣ ширкатҳои мухобиротии маҳаллӣ хабар доданд, ки басташавӣ ба далели маҳдудияти пахши ин шабакаҳо тавассути моҳвораҳои байналмилалӣ ва интиқоли онҳо ба моҳвораҳои Русия рух додааст.
