Дар Русия консепсияи нав оиди сиёсати муҳоҷиратӣ қабул гардид
Дар VI — умин Конгресси байналмилалии ҳамватанони русӣ ки санаи 31 октябр дар шаҳри Маскав баргузор гардид, президенти Русия Владимир Путин имзошавии консепсияи нави давлатӣ доир ба сиёсати муҳоҷиратиро эълон намуд. «Имрӯз ман контсептсияи таҳриршудаи сиёсати давлатии муҳоҷиратии Русияро ба имзо расонидам. Санад беҳдошти шароити кӯчидани ҳамватанонро барои зиндагии доимӣ ба кишвар, таҳияи тартиботи дақиқи қавонини вуруд, гирифтани ҳуқуқи кору зиндагӣ ва шаҳрвандии Русияро пешбинӣ мекунад. Аксарияти муаммоҳо ва монеаҳои бюрократӣ дар соҳаи мазкур ки оиди ин ҳамватанон арз карда буданд бардошта шуд», матни пурраи консепсия дар сомонаи Кремл нашр шудааст.
Мушоҳидон қайд мекунанд, ба ғайр аз ин ҳама дар консепсияи нав як қатор чораҳо дарҷ гардидаанд, ки воридот ва ҷараёни ба қайддарории муҳоҷирони меҳнатӣ аз Осиёи Миёна дар қаламрави ФР боз ҳам душвор мегардонад. Санади мазкур ки шаш сол мӯҳлат дорад асосан барои ривоҷ додани минтақаҳои рӯҳафтода ва ҳал кардани муаммоҳои демографӣ нигаронида шудааст. Тарафдорони консепсияи нав мавқеи худро аз ҷиҳати иқтисодӣ асоснок карда мегӯянд, ки гӯё муҳоҷирони меҳнатӣ ба маоши кам қаноатманд буда, аз дасти шаҳрвандони ФР имтиёзҳоро кашида мегиранд. Бо вуҷуди ин онҳо бо ҷомеаи Русия якҷо намешаванд, яъне дар маданият, забон ва дини худ боқӣ мемонанд.
Ба ақидаи иқтисодчӣ Евгения Чернина муҳоҷират ин ягона воситаест, ки камчинии қувваи кориро мепӯшад ва муҳоҷирон асосан ҷойҳои кории дараҷаи ихтисоси пастро интихоб менамоянд, ки дар он шаҳрвандони ФР намехоҳанд кор бикунанд. Аз ин лиҳоз кору фаъолияти муҳоҷирони меҳнатӣ ба маоши шаҳрвандони ФР зараре намерасонад.
Оиди мавзӯи мазкур Каримҷон Ёров дар барномаи «Ба ҳодиса рӯй овардан» дар студияи радиои Озодӣ изҳори ақида намуд: «Рости гап, ман пештар ҳам пешниҳод карда будам, агар шумо гӯед, ки дар ҳамаи муаммоҳои шумо муҳоҷирон айбдор ҳастанд, бигзор режими раводид ворид карда шавад ва дар айни замон мехоҳам, ки аз кишварамон артиши бегона бароварда шавад. Мо намехоҳем, ки низомиёни хориҷӣ дар кишварамон ҳузур дошта бошад, амниятро худамон таъмин хоҳем кард. Аз кишварамон дар назди давлатҳои Хитой, Афғонистон ва ғайра минтақаи буферӣ насозанд».
