Минбаъд маълумотномаи тиббӣ барои синфҳои ибтидоӣ пулакӣ мешавад
Дар арафаи саршавии соли таҳсилоти нав шаҳрвандони Тоҷикистон, ки фарзандонашон ба синфи ибтидоии мактаби миёна мераванд бо тартиботи нави гирифтани маълумотномаи муоинаи тиббӣ рӯбарӯ мешаванд.
Минбаъд маълумотномаи тиббии ҳатмӣ шакли 026 — ро аз марказҳои пизишкгоҳи оилавӣ ё ин ки аз лабараторияҳои тиббӣ «Беҳдошт», ки ба ширкати «Фароз» мутааллиқ мебошад дастрас намуда мешавад. Айни замон нархи маълумотномаи мазкур то 78 сомонӣ афзоиш ёфтааст. Ёдрас мекунем, ки каме пеш маълумотномаи мазкурро волидайн дар муолиҷахонаҳои маҳаллӣ бо нархи 5 сомонӣ дастрас менамуданд.
«Волидайни мактаббачагони синфҳои ибтидоӣ ва кӯдаконе, ки ба кӯдакистон мераванд, бо тариқи ҳатмӣ маълумотномаи тиббии шакли 026 — ро танҳо аз шӯъбаҳои пизишкии ширкати «Фароз» бояд дастрас намоянд. Муоинаи кӯдак дар маркази пизишкгоҳи оилавӣ аз ҷониби духтур бо нархи 30 сомонӣ гузаронида мешавад. Инчунин, 48 сомонӣ барои таҷзия дар лабараторияҳои ширкати «Беҳдошт» пардохт карда мешавад. Пас аз чунин муоинаҳо ба кӯдак корти тиббӣ тартиб дода мешавад», мегӯяд мудири маркази пизишкгоҳи оилавии шаҳри Ҳисор Шаҳло Шарифова. Бояд қайд намуд, ки намуди фаъолияти асосии ширкати «Фароз» дар Тоҷикистон воридот ва фурӯши маҳсулотҳои нафтӣ ва гази моеъ мебошад.
Манбаи «Хабарҳо» дар шаҳри Душанбе иттилоъ медиҳад, ки ширкати мазкур ба оилаи Раҳмон, аниқтараш ба шавҳари яке аз духтарони ӯ мутааллиқ мебошад ва аз соли гузашта шурӯъ намуда ширкати мазкур лабараторияҳои экспресс-ташхисот бо лавозимотҳои қимматбаҳо муҷаҳҳаз менамояд.
