Муфтӣ дурӯғи ВКД-ро фош кард
Рӯзи 17 октябр дар Масҷиди марказии шаҳри Душанбе, раиси Шӯрои уламои Тоҷикистон Саидмукаррам Абдуқодирзода гуфтаҳои расмии ҳамла ба ӯро, ки гӯё аз рӯи авбошӣ сурат гирифтааст, рад карда, изҳор намуд, ки ҷавоне, ки ба ӯ ҳамла кард, аз «ҷумлаи пайравони гурӯҳҳои экстремистӣ» мебошад. Муфтӣ итминон дорад, ки сӯиқасд ба ҷони ӯ аз хориҷ ташкил шудааст. «Ин гурӯҳи ҷавонони камсавод бо фаҳмиши нодуруст мебошанд. Онҳо фикр мекунанд, ки ба Ислом хидмат мекунанд. Аммо ба ин экстремистон нигоҳ кунед — онҳо мусалмон нестанд. Онҳоро тавассути интернет ва шабакаҳои иҷтимоӣ ҷалб мекунанд. Онҳое, ки онҳоро даъват мекунанд, роҳнамоӣ мекунанд ва дастур медиҳанд, ҳеҷ гоҳ онҳоро шахсан надидаанд», — изҳор дошт ӯ. Илова бар ин, дар навори 30-дақиқаӣ, ки Маркази исломии Тоҷикистон дар шабакаи YouTube нашр кардааст, дар пешонии муфтӣ захми калон дида мешавад.
Ҳамин тариқ, Абдуқодирзода комилан гуфтаҳои пештараи расмии ВКД ҶТ-ро дар бораи авбошӣ, ки гӯё ба фаъолияти касбии муфтӣ иртибот надошт, рад кард. Ёдовар мешавем, ки ҳамла рӯзи 11 сентябр дар ҳавлии масҷиди марказии шаҳри Душанбе баъд аз адои намози ҷамоӣ рух дода буд.
Аён аст, ки муфтӣ Абдуқодирзода бинобар хизматгузории содиқона ба режими Раҳмон ва сафед кардани ҳар як амалҳои ӯ, аз ҷумла манъи арзишҳои асосии исломӣ, обруи манфӣ пайдо кардааст. Аммо мақомот намехоҳанд ба зуҳуроти нафрат нисбат ба ӯ таваҷҷӯҳ кунанд, бинобар ин, эҳтимолан қарор намуданд, ки ҳодисаи сӯиқасд ба ҷони муфтӣ пинҳон карда шавад.
Қобили зикр аст, ки Шӯрои уламои Тоҷикистон дар сомонаи YouTube шабака кушодааст, ки дар он муфтӣ ҳафтае як маротиба ба саволҳои марбут ба мавзӯъҳои динӣ ба сокинони кишвар посух медиҳад. Аввалин пахш бо иштироки Абдуқодирзода рӯзи 10 октябр баргузор шуд. Аммо ҷолиби диққат дар он аст, ки дар вақти пахши мустақим Саидмукаррам танҳо ба саволҳое ҷавоб медод, ки тавассути зангҳои телефонӣ ба ӯ расонида мешуданд, он ҳам бо тарзи барои пахшҳои мустақим ғайриоддӣ. Мушкил дар он аст, ки саволҳоро танҳо худи муфтӣ мешунавид, яъне ба одамон имкони сухан кардан дар пахш дода намешуд, чунон ки одатан дар барномаҳои чунин формат сурат мегирад. Илова бар ин, истифодабарандагон имкони гузоштани шарҳҳо ва фикру мулоҳизаҳои худро дар бораи пахш надоштанд. Зеро тугмаи шарҳ дар навор аз ҷониби мудирони шабака хомӯш карда шуда буданд. Аён аст, ки мудирони шабака хуб мефаҳманд, ки агар дар зери навор тугмаи шарҳ барои корбарон дастрас бошад, паёмҳои хашмгин ва дашном ба сӯи муфтӣ мисли борон мерезанд.
