Иштирокчии муноқиша бо скинхедҳо боздошт шуд
Тавре ки рӯзи 29 июн маълум гардид, додгоҳи шаҳри Москва Амиршоҳ Хусейнов, муҳоҷири меҳнатии тоҷикро, ки дар муноқиша бо скинхедҳо ширкат кардааст, ба мӯҳлати ду моҳ ҳабс кард. Муҳоҷири меҳнатӣ ба авбошӣ бо истифода аз силоҳ муттаҳам мешавад. Дар ин бора фаъоли ҳуқуқи башар Валентина Чупик дар саҳифаи худ дар Фейсбук хабар додааст.
Ёдрас мекунем, ки рӯзи 23 июн як гурӯҳ скинхедҳо дар кӯчаи Толбухина дар шаҳри Москва мегузаштанд ва шиорҳои «Русия барои русҳо, Москва барои москвагиҳо»-ро мегуфтанд. Аммо як гурӯҳи муҳоҷирон аз Доғистон ва кишварҳои Осиёи Марказӣ муқобили онҳо омаданд, ки дар натиҷа муноқиша сар зад. Наворҳое, ки дар шабакаҳои иҷтимоӣ паҳн шудаанд, нишон медиҳанд, ки чӣ гуна ҳангоми муноқиша скинхедҳо рақибонро бо корд таҳдид мекарданд ва ҳатто яке аз онҳо бо таппонча таҳдид мекунад. Баъдан, ҳамаи иштирокчиёни муноқиша аз ҷониби полис боздошт шуданд. Шабакаи Telegram-и Mash гузориш дод, ки ҳангоми кофтукови скинхедҳо аз онҳо се адад корди қаламтарош ва як корди қиртосӣ ва инчунин таппончаи пневматикӣ ёфт гардидааст.
Қобили зикр аст, ки ба гуфтаи фаъоли ҳуқуқи башар Валентина Чупик, Амиршоҳ Хусейнов, бар хилофи тавсияҳои ҳимоятгар, истифодаи силоҳеро, ки дар даст надошт, эътироф кардааст, ки ин фишори ҷисмонии мақомоти тафтишотӣ ба ӯ карда шударо ифода мекунад. «Боз каме интизор шавед ва маълум мешавад, ки маҳз Амиршоҳ бо овози баланд «Русия барои русҳо, Москва барои москвагиҳо» гуфтанаш аён мегардад, — менависад ҳомии ҳуқуқ.
Ҷолиби диққат аст, ки додгоҳ дар амали скинхедҳои мусаллаҳ ягон чизи ғайриқонунӣ пайдо накард ва далелҳои тафтишотро барои татбиқи чораи пешгирикунанда нисбат ба зодаи Тоҷикистон кофӣ ҳисобид, дар ҳоле ки далелҳои ҳимоя хеле боварибахш буданд.
