Дар Русия боз муҳоҷирони меҳнатӣ бо айби терроризм дастгир шуданд
Муҳоҷирони меҳнатӣ аз Осиёи Миёна боз қурбони хадамотҳои махсуси Русия гардиданд.
Ҳамин тавр, санаи 20-уми апрел дар шаҳри Санкт-Петербург аз тарафи кормандони ФСБ ва низомиёни Росгвардия оиди дастгир намудани 5 муҳоҷир аз Осиёи Миёна, ки дар терроризм айбдор дониста мешаванд, амалиёти махсус гузаронида шуд. Чи тавре ки дар шӯъбаи минтақавии Кумитаи тафтишоти ФР иттилоъ додаанд, нисбати ду нафари дастгиршудагон парвандаи ҷиноӣ оғоз гардид.
Парвандаи ҷиноӣ бо моддаҳои 30 қисми 1 ва 205.5 қисми 2 КҶ ФР (суиқасд барои иштирок намудан дар ташкилоти террористӣ) оғоз гардид. Дар нақши асосӣ дар парвандаи ҷиноии мазкур 2 нафар муҳоҷирони меҳнатии 21 сола аз Осиёи Миёна мебошанд. Кумитаи тафтишотии Русия оиди дастгиршавӣ навори видеоиро нашр намудааст. Дар он мушоҳида карда мешавад, ки кормандони Гурӯҳи Махсуси Зуд Ҳаракат (СОБР) ба утоқ зада медароянд, ки дар онҷо муҳоҷирони меҳнатӣ мезистанд. Ба ақидаи Кумитаи тафтишотӣ аз моҳи декабри соли 2017 то моҳи апрели соли 2018 дастгиршудагон гӯё бо воситаи сомонаи иҷтимоӣ мехостанд бо ҳамшаҳриёни худ, ки дар Сурия ҳастанд ба алоқа бароянд.
