Марги нахустин аз коронавирус дар Қазоқистон ба қайд гирифта шуд

Мақомоти Қазоқистон хабар доданд, ки як сокини шаҳри Нур-Султон аз коронавирус фавтидааст. Ин аввалин марги сабтшуда аз коронавирус на танҳо дар Қазоқистон, балки дар тамоми минтақаи Осиёи Марказӣ ба ҳисоб меравад. Дар ин хусус рӯзи 26-уми март дар брифинг вазири иттилоот ва рушди иҷтимоии Қазоқистон Даурен Абаев хабар дод.

Тибқи маълумоти расмӣ, дар Қазоқистон 111 ҳолат, дар Ӯзбекистон 65 ва дар Қирғизистон 44 ҳолати сирояти коронавирус ошкор шудааст. Дар навбати худ, мақомоти Тоҷикистон ва Туркманистон иддао доранд, ки дар ин кишварҳо ягон ҳолати сироятёбӣ бо коронавирус ба қайд гирифта нашудааст. Аммо, дар аснои сар задани коронавирус садҳо шаҳрвандони Тоҷикистон дар Чин қарор доштанд ва баъдтар ба Тоҷикистон баргаштанд. Вале, Ҳукумати Тоҷикистон то ҳол изҳор мекунад, ки дар кишвар ягон сироятшавӣ ба қайд гирифта нашудааст, ки ин шубҳаҳоро пайдо мекунад.

Дар ҳоли ҳозир, 26-уми март шумораи умумии сирояти коронавирус дар ҷаҳон бори аввал аз 500 ҳазор убур кард ва шумораи дақиқи он 500 542 нафарро ташкил намуд. Шумораи фавтидагон аз ин вирус аллакай 22 334 нафар буда, 121 214 нафар бемор табобат ёфтаанд.