Ҳомиёни ҳуқуқи башари Русия талаб доранд муҳоҷирони меҳнатиро аз боздоштгоҳҳои махсус раҳоӣ намоянд
Ҳомиёни ҳуқуқи башари Русия талаб доранд муҳоҷиронро аз боздоштгоҳҳои муваққатии Русия раҳоӣ намоянд, дар ин хусус сомонаи dw.com иттило медиҳад. Ҳомиёни ҳуқуқ бар он ақидаанд, ки дар марказҳои боздошти муваққатии муҳоҷирон ташкил намудани системаи зарурии муҳофизат аз коронавирус мушкил аст, аз ин рӯ, бояд шаҳрвандони хориҷиеро, ки депорти худро интизоранд аз марказҳои боздошти муваққатии шаҳрвандони хориҷӣ раҳоӣ карда шаванд. Бо сабаби вазъи коронавирус ва сарҳадҳои басташуда онҳоро наметавонанд аз кишвар хориҷ кунанд. Муроҷиати муштараки ҳомиёни ҳуқуқ 29-уми марти соли ҷорӣ дар сомонаи ташкилоти ҳомиёни ҳуқуқ Кумитаи «Ҳамкории шаҳрвандӣ» нашр гардид. Дар санад гуфта шудааст, ки тадбири мазкур барои ҳифзи «ҳаёт ва саломатии одамон дар Марказҳои боздоштгоҳи муваққатии шаҳрвандони хориҷӣ, ки дар онҷо шароити ташкили системаи мукаммали ҳифз ва кӯмаки тиббии самаранок мавҷуд нест» лозим аст.
Ёдрас мекунем, ки бинобар баста шудани сарҳадҳои давлатӣ дар кишварҳои Осиёи Миёна, муҳоҷирони меҳнатӣ ба қазои тақдир ҳавола карда шуданд. Ва дар ҳоле ки бархе аз муҳоҷирон дар Марказҳои боздоштгоҳи муваққатии шаҳрвандони хориҷии Русия гаравгон бошанд, қисми дигари муҳоҷирон якчанд рӯзҳои аввалро дар фурудгоҳҳои Москва бо интизори хатсайри чартерӣ аз ватан гузарониданд. Шаби 30 ба 31 март тақрибан 300 муҳоҷирон аз Осиёи Марказӣ аз ҳудуди фурудгоҳ ба кӯча ронда шуданд, маълумот дар бораи қазияи мазкур дар сегменти тоҷикии шабакаҳои иҷтимоӣ пайдо гардид.
