СПАД нерӯҳояшро аз Қазоқистон хориҷ мекунад
Оҷонсии хабарии РБК бо такя ба котиботи СПАД хабар дод, ки вазирони дифои кишварҳои узви ин созмон созишнома дар бораи хуруҷи нерӯҳо аз қаламрави Қазоқистонро имзо карданд.
«Роҳбарони вазоратҳои мудофиа қарори муштараки Шӯрои вазирони дифоъи СПАД дар бораи ташкили баргардонидани контингентҳои низомии кишварҳои узви Созмони Паймони Амнияти Дастаҷамъӣ аз қаламрави Ҷумҳурии Қазоқистон ба нуқтаҳои истиқрори доимии худро ба имзо расониданд», — гуфта шудааст дар котибот.
Ба гуфтаи вазири дифои Русия Сергей Шойгу, бозгашти нерӯҳои кишварҳои узви СПАД аз Қазоқистон, ки аз 13 январ оғоз шуда буд, рӯзи 19 январ ба поён мерасад.
Дар ин бора вай дар мулоқот бо президенти Русия Владимир Путин хабар дод. «Мо имрӯз ба хуруҷи нерӯҳо шурӯъ мекунем. Пагоҳ мо тамоми нерӯҳои ҳамкасбонамон — Арманистон, Тоҷикистон, Беларусро аз 14 тараф берун мебарорем. Ҳамкорони қирғиз бо назардошти он ки дар наздикӣ ҳастанд, худашон мераванд. Сипас, дар давоми панҷ рӯз, чун интиқоли объектҳо хуруҷи боқимондаи нерӯҳои посдории сулҳ анҷом дода мешавад.
Ёдрас мекунем, ки нерӯҳои низомии СПАД ба Қазоқистон пас аз талаби раисиҷумҳур Токаев рӯзи 5 январ дар баргузории амалиёти зиддитеррористӣ барои саркӯб кардани тазоҳуроти зиддиҳукуматӣ, ки рӯзи 2 январ дар Жанаозен оғоз шуда, тамоми Қазоқистонро фаро гирифт, вуруд гардид. Дар ҷаласаи Шӯрои амният Токаев эътирозгаронро «террористҳо»-и дар хориҷа таълим гирифта номида, аз зарурати амалиёти зиддитеррористӣ хабар дод ва пас аз он расман ба СПАД барои кӯмак муроҷиат кард. «Дар ин замина мо бояд амалиёти зиддитеррористӣ анҷом диҳем, то онҳо безарар гарданд. Ман шахсан масъулияти ситоди зиддитеррористиро бар ӯҳда дорам. Омори ҳамлаи террористӣ, ки аз ҷониби роҳзанҳо амали гардид — террористони воқеӣ мебошанд. Мо медонем, ки онҳо ҳоло дар Алмаато ва дигар шахрҳо игвогарй мекунанд. Онҳо биноҳои инфрасохторӣ ва муҳимтар аз ҳама, биноҳоеро, ки силоҳҳои тирандозӣ ҷойгиранд, забт мекунанд. Онҳо бо курсантҳои донишкадаҳо ҷанг мекунанд. Дар ҳоли ҳозир дар наздикии шаҳри Алмаато бо воҳидҳои десантии вазорати мудофиа ҷанг идома дорад”, — гуфт Токаев.
Қобили зикр аст, ки ба ҷуз аз низомиёни Русия, Беларус ва Арманистон, нерӯҳои низомии Тоҷикистон ва Қирғизистон ба Қазоқистон фиристода шуданд. Тасмими фиристодашавии низомиён дар ҳайати СПАД ба Қазоқистон аз сӯи порлумонҳои ду кишвар гирифта шуд, ки боиси маҳкумият ва норозигии сокинони ҳам Қирғизистон ва ҳам Тоҷикистон гардид. Фаъолони қирғиз дар назди бинои порлумон дар шаҳри Бишкек ҷамъомад ташкил карда, талаб карданд, ки нерӯҳо фиристода нашаванд. Фаъолони тоҷик бо назардошти солҳои тӯлонии саркӯби ҳар гуна чунин фаъолият бо як флешмоб аз тасмими мақомот норозиги баён намудаанд.
