Кӯлоб: кормандони милитсия боз халос мешаванд
Аз се афсари пулис, ки бо гумони даст доштан дар марги сокини Кӯлоб Абдуқаҳҳор Розиқов боздошт шуда буданд, ду нафари онҳо бо пардохти гаравпулӣ озод шуда, нисбати сеюмӣ аз рӯи моддаи сӯиистифода аз мақом парвандаи ҷиноӣ боз шудааст.
Додситонии минтақавии Кӯлоб алайҳи Шамшод Шарифов, корманди ВКД-и шаҳри Кӯлоб бар асоси қисми 3 моддаи 316 (сӯистифода аз ваколатҳо) Кодекси ҷиноятии Ҷумҳурии Тоҷикистон парвандаи ҷиноӣ боз кардааст. Ба ӯ то 100 ҳазор сомонӣ ҷарима ва ё аз 5 то даҳ сол зиндон таҳдид мекунад. Дар ин бора Радиои Озодӣ бо такя ба манобеи худ дар додситонӣ хабар дод.
Ёдрас мекунем, ки рӯзи 2-юми январ Абдуқаҳҳор Розиқов, сокини 37-солаи Кӯлоб аз ҷониби маъмурони пулис боздошт ва дар шароити номуайян дар бинои шӯъбаи корҳои дохилӣ ба ҳалокат расида буд. Наздикони Розиқов гуфтаанд, ки Абдуқаҳхор бар асари шиканҷаи шадиди маъмурони пулис ҷон додааст.
Рӯзи 3 январ наздикон ва дӯстон ӯ дар назди бинои “морг” -и маҳаллӣ ҷамъ омаданд. Онҳо аз гирифтани ҷасад худдорӣ карда, талаб карданд, ки гунаҳкорони марг пайдо ва ҷазо дода шаванд. Ҷасади Абдуқаҳҳор Розиқовро баъд аз он аз мурдахона гирифта ба хок супурда шуд, ки комиссия дар ҳузури раиси шаҳри Кӯлоб «дар бораи боздошт ва бозпурсии се корманди пулис» хабар дод.
Таҷрибаи бадрафторӣ нисбати боздоштшудагон ва гумонбаршудагон аз ҷониби кормандони мақомоти ҳифзи ҳуқуқ системавӣ мебошад. Нерӯҳои қудратии Тоҷикистон барои гирифтани иқрор аз ҳама василаҳо истифода мекунанд, ки дар бархе маворид боиси марг мешавад. Масалан, моҳи марти соли 2018 Абдурасул Назаров, сокини боздоштшудаи шаҳри Кӯлоб, бино ба иттилои расмӣ, дар шӯъбаи корҳои дохилии Сино-2 бар асари сактаи қалб даргузашт, вале наздикон гуфтаанд, ки ҷасади ӯро аз шӯъбаи травматологияи шифохонаи Қараболо бо осори лату кӯб ва шиканҷа гирифтаанд.
Моҳи сентябри соли 2015 Умар Бобоҷонов барои доштани риш аз сӯи пулис шадидан латукӯб шуда буд. Пас аз як рӯз ӯро аз пулис бо ҷароҳатҳои вазнини ҷисмонӣ ба шӯъбаи эҳёгарии бемористони маҳаллӣ оварданд, ки Умар дар он ҷо ба кома афтод ва пас аз як ҳафта даргузашт.
Моҳи ноябри соли 2013 сокини 34-солаи ҷамоати Чоркӯҳи ноҳияи Исфара, узви раёсати Ҳизби наҳзати исломии Исфара Умедҷон Тоҷиев аз тирезаи ошёнаи сеюми шӯъбаи корҳои дохилии маҳаллӣ ба берун ҷаҳида ва дар беморхонаи зиндон ба ҳалокат расидааст. 10 апрели соли 2021 Меҳроҷиддин Гадозоди 33-сола барои бозпурсӣ даъват шуда, бегоҳи ҳамон рӯз ҷасади ӯро ба наздиконаш супурданд.
