Саидмукаррам Абдуқодирзода бар зидди «идгардак»
Шӯрои Уламои Тоҷикистон дар муроҷиати худ ба сокинони кишвар изҳор намуд, ки анъанаи «идгардак» — и кӯдакон хона ба хона гашта ба хотири фарорасии Иди Фитр (Иди Рамазон) шириниҳо гирифтанашон бар хилофи аҳкомҳои Шариат ва мазҳаби Ҳанафӣ будааст, вале ба гуфтаҳои хеш далели аниқ наовард.
Ба ақидаи раиси Шӯрои Уламои Тоҷикистон Саидмукаррам Абдуқодирзода «идгардак» аз як ҷиҳат ба кисаи сокинони кишвар зарар буда, аз ҷиҳати дигар ба саломатии кӯдакон хавф эҷод мекунад. «Анъанаи зерин дар Ислом вуҷуд надорад. Ғайр аз ин, анъанаи зеринро ҳамаи сокинони кишвар риоя намекунанд, хусусан минтақаҳои шимол ва шарқи кишвар», мегӯяд дар муроҷиати худ Саидмукаррам Абдуқодирзода.
Ғайр аз ин, Абдуқодирзода касоне, ки ба хотири ҷашни ид саховатмандӣ карда маърака ташкил мекунанд, онҳоро исрофгар номид. Бинобар ин, аз ташкили чунин дастархонҳои дасткушод сокинони кишварро ба худдорӣ намудан даъват кард.
Дар арафаи ҷашни Иди Фитр президенти Тоҷикистон Раҳмон низ ба сокинони кишвар бо муроҷиати зерин баромад карда гуфт: «Ба тақлиди бегона ва исрофкорӣ роҳ мадиҳед, бо таҳаммул бошед ва сарфаҷӯӣ кунед, ба ҷои дастархони дасткушод бо ахлоқи нек кифоят намоед», иброз намуд ӯ.
Ёдрас мекунем, ки нисбати ҷашнҳои ғайриисломӣ аз тарафи Шӯрои Уламои Тоҷикистон муроҷиате карда нашудааст. Баръакс, Саидмукаррам Абдуқодирзода нисбати ҷашни Иди ҷоҳилияти Наврӯз гуфт: «Имрӯз Наврӯз ҳамчун иди баҳор қабул шудааст. Иди саршавии корҳои мавсими баҳор. Агар бихоҳед амали шоиста анҷом диҳед, таом тайёр намуда ба ятимон хайр намоед. Ин амали шоистааст ва шариат амалҳои шоистаро қабул менамояд».
Инчунин рӯҳониёни расмӣ дар хусуси ҷашни иди соли навӣ аз тарафи сокинони кишвар низ хайрхоҳона иброз намуда буд: «Ҷашн гирифтани Иди соли нав ин як анъанаст, на ибодат», иброз намуда буд Шӯрои Уламо. Вале дастархонҳои дасткушод, ки дар иди соли навӣ карда мешавад, мазаммат накарда буд.
Ҷолиби диққат аст, ки кушод ва пурвусъат ҷашн гирифтани ду ид дар Ислом Иди Фитр ва Иди Қурбон аз ҷониби шариат қонунӣ гардонида шудааст. Мусулмонони тамоми ҷаҳон қариб якуним аср мешавад, ки чунин ҳолати диниро муҳофизат карда меоянд. Меҳмононро таклиф намуда, ба кӯдакон зиёфат тайёр мекунанд, ки табиӣ дар зеҳни кӯдакон қиматҳои Исломӣ устувор ҷоӣ мегирад. Ин боиси нафрат пайдо кардани режими Раҳмон мегардад. Аз ин рӯ, Абдуқодирзода қарор кардааст, ки ба сокинони кишвар муроҷиат намояд.
