Кормандони консулгарӣ аз рӯи муҳоҷирони меҳнатӣ пул кор мекунанд
Дар заминаи пандемия, кормандони консулгарии Туркманистон дар Русия кӯшиш мекунанд аз рӯи муҳоҷирони туркман, ки дар вазъияти душвор қарор гирифтанд, пул кор бикунанд. Ҳамин тавр, 7-уми октябр Туркманистон парвози таҳлиявӣ аз Домодедово барои шаҳрвандони дар Русия мондаро ташкил кард.
Тибқи иттилои расмӣ, барои парвоз ба ватани худ, шаҳрвандони Туркманистон танҳо бояд чиптаи ҳавопаймоӣ Туркманистонро дошта бошанд, ки он то охири соли 2021 дароз карда шудааст.
Аммо, тибқи иттилои Turkmen news, ба ҷуз аз чипта барои имкони парвоз ба ватан, кормандони консулгарии Туркманистон аз мардум 75000 рубл (тақрибан 955 доллар) тамаъҷӯӣ мекарданд.
Мувофиқи ҷадвал хатсайр бояд соати 11 парвоз мекард. Соати 10:30 дақиқа дар сомонаи фурудгоҳ паём пайдо шуд, ки ба қайдгирии мизоҷон ба анҷом расидааст.
Аммо, дар асл, ҳавопаймо соати 13:45 парвоз кард. Он замон кормандони консулгарӣ аз мизоҷон талаб карданд, ки барои чипта 75 ҳазор рубли иловагӣ пардохт намоянд”, — менависад Turkmen news.
Чунин нақшаи пул коркуниро на танҳо кормандони Вазорати корҳои хориҷии Туркманистон истифода мебаранд. Шаҳрвандони Тоҷикистон низ борҳо дар шабакаҳои иҷтимоӣ ба мақомоти Тоҷикистон шикоят ва муроҷиатҳо карда буданд, ки кормандони сафорати Тоҷикистон дар Русия аз онҳое, ки мехоҳанд бо хатсайри чартерӣ ба ватан баргарданд, маблағи иловагӣ талаб мекунанд.
