Мақомоти Ӯзбекистон контентҳои блогерон ва рӯзноманигоронро назорат мекунад
Дар Ӯзбекистон бо қарори ҳукумат фармон дода шуд, ки контентҳо ва шарҳҳои дар интернет ҷойдоштаро, ки мақомот ғайриқонунӣ мешуморанд, нест карда шаванд. Қарори Ҳукумат таҳти рақами 807 аз 23-ми декабр тартиби фиристодани ба соҳибони сомонаҳо, саҳифаҳои сомонаҳо ва мессенҷерҳо, инчунин ба блогерон огоҳнома дар бораи нест кардани маълумоте, ки паҳн кардани он дар Ӯзбекистон манъ шудааст, тасдиқ кард.
Хабар дода шудааст, ки дар тӯли 24 соат маркази алоқаи оммавии Оҷонсии иттилоот ва коммуникатсияи оммавии назди дастгоҳи Президенти Ӯзбекистон расман дар шакли электронӣ ба соҳибони сомонаҳо, блогерҳо дар бораи нест кардани маълумоти ғайриқонунӣ огоҳнома мефиристад. Соҳиби манбаи иттилоотӣ ё блогер бояд дар давоми 24 соат аз вақти гирифтани огоҳнома эътиборан маълумоти ғайриқонуниро тоза кунад ва дар ин бора ба Марказ хабар диҳад.
Агар маълумоти ғайриқонунӣ аз ҷониби соҳиби манбаи иттилоотӣ дар мӯҳлати муайяншуда нест карда нашавад, пас Оҷонсии иттилоот ва коммуникатсияи оммавӣ метавонад ба маъмури шабакаи иҷтимоӣ ё мессенҷере, ки дар он маълумоти ғайриқонунӣ ҷойгир шудааст, тамос гирад ё бо даъво барои нест кардани маълумот ба додгоҳ муроҷиат мекунад.
Коршиносон қайд мекунанд, ки қонуни нав бешубҳа рӯзноманигорон ва блогнависони мустақилро дар бар мегирад, ки минбаъд онҳо қонунӣ маҷбур карда мешаванд маводи интиқодӣ дар бораи режимро хориҷ кунанд. Фармони нав аллакай бо Роскомнадзори Русия ки василаи сензураи Кремл аст, муқоиса карда шуд ва ба он имкон медиҳад, ба ҳама гуна маводҳои барои мақомот мухолифро дар интернет манъ кунад ва ё нест кардани онро талаб кунад, бо ин аз ҷараёни дарози додгоҳӣ барои аниқ кардани мавод ҳамчун ғайриқонунӣ буда бе эътибор мегузорад.
