Вазорати меҳнати Тоҷикистон алайҳи муҳоҷирони меҳнатӣ
Намояндагии Вазорати меҳнат, муҳоҷират ва шуғли аҳолии Тоҷикистон дар Федератсияи Русия рӯзи 18 январ бо нашри як баёнияи матбуотӣ вазъи корпартоии коргарони тоҷикро дар корхонаи «Химпек», ки дар вилояти Ростов лаби Дон ҷойгир аст, шарҳ дод. «Дар миёнаҳои моҳи январ беш аз 50 муҳоҷири тоҷику ӯзбек ба доми ҷавоне, ки қаблан дар Британияи Кабир кор кардааст, фирефта шудаанд», — гуфта шудааст дар баёния. Масъулони тоҷик корпартоии коргаронро ғайриқонунӣ хонданд, зеро соли гузашта гӯё «музди коргарон ба 80—85 ҳазор рубл баланд бардошта шудааст».
Ёдрас мекунем, ки рӯзи 15 январ 55 муҳоҷирони меҳнатӣ аз Тоҷикистону Ӯзбекистон дар корхонаи Химпек бо талаби афзоиши музди меҳнат ва пардохти пули таътил барои соли 2023, корпартоӣ карданд. Дар навбати худ маъмурияти корхона ба корпартофтагон музди меҳнати моҳи январро пардохт намуда, аз кор пеш кардааст. Муҳоҷирони меҳнатие, ки аз чунин тасмими ноодилонаи маъмурияти корхона бархӯрдор шудаанд ба ҳукумати Тоҷикистон як паёми видеоӣ ирсол карданд, то ниҳодҳои дахлдор аз ҳуқуқи онҳо ҳимоят кунанд.
«Намояндагии Вазорати меҳнат ба ҷои дастгирии мо, аз корфармои Русия пуштибонӣ кард. Коргарон ҳеҷ кори нодуруст накардаанд», «Ин на иғво асту на қонуншиканӣ. Корфармои Русия медонад, ки мақомоти Тоҷикистон муҳоҷиронро дастгирӣ намекунад ва аз ин лиҳоз онҳоро аз кор озод мекунанду ба онҳо маоши муносиб намедиҳанд», гуфт муҳоҷири меҳнатӣ аз Тоҷикистон. Инчунин муҳоҷирон дар сӯҳбат бо радиои Озодӣ изҳор доштанд, ки маълумот дар сомонаи Вазорати меҳнати Тоҷикистон ба воқеият мувофиқ нест: онҳо ҳеҷ гоҳ 80-85 ҳазор рубл музд нагирифтаанд ва роҳбарияти Химпек ваъдаҳое, ки дода буд, ҳеҷ якеашро иҷро накардааст.
Қобили зикр аст, ки дар охири моҳи гузашта раисиҷумҳур Раҳмон дар паёми худ ба парлумон ғайричашмдошт мавзӯи муҳоҷирони меҳнатиро матраҳ карда, ваъда дода буд, ки ҳуқуқи онҳоро ҳимоя хоҳад кард. Чӣ тавре ки интизор мерафт, ваъдаҳои ӯ танҳо як гапи хушки холӣ буданд, ки Вазорати меҳнат, муҳоҷират ва шуғли аҳолии Тоҷикистон дар амал онро нишон дод.
