Клани Раҳмон бизнес-империяи худро вусъат медиҳад

Чи тавре ки сомонаи «Ахбор» иттило медиҳад, калонтарин бозори яклухт дар шаҳри Душанбе «Фаровон» ва маркази савдои «Садбарг» пурра ба назорати домоди Раҳмон — Зарифбек Давлатов мегузарад.

Яке аз тоҷири ин бозор бинобар шарти ниҳонӣ ба сомона иттило дод, ки аз соли 2019 шурӯъ карда шартҳои кирокунӣ ва кор намудан дар нуқтаҳои тиҷоратӣ аз нав дида баромада мешавад. Соҳиби нави бозор мехоҳад нисфи бозорро вайрон намуда ба ҷои он маркази тиҷоратии муосир бунёд намояд.

Пештар бозори «Фаровон» ҳамчун ҷамъияти саҳомӣ аз ҷониби якчанд соҳибкорон идора карда мешуд, дар он замон мо мӯътадил кор мекардем. Айни замон бозорро домоди раисҷумҳур Зарифбек ба даст овард. Рости гап саргардон шудем, ки оё дар инҷо минбаъд ба мо изн медода бошанд кор кунем ва тиҷорати мо чи мешуда бошад», шикоят намуд ӯ.

Тиҷорати оилаи Зарифбек Давлатов, ки аз тарафи додари хурдияш Шерзод Давлатов идора карда мешавад аз якчанд маршрути нақлиёти мусофиркашӣ, ҳиссае дар бозори сохтмони манзилҳои зист дар шаҳри Душанбе, воридоти нақлиёти автомобилӣ ва нӯшокии қувватдиҳандаи «Red Bull» дар Тоҷикистон ва ҳоказо иборат мебошад.

Пештар бо қарори раиси шаҳр бозори «Меҳргон» бар ӯҳдаи ширкати «Фароз» супорида шуда буд, ки ба домоди дигари раисҷумҳур — Шамсуллоҳ Соҳибов мутааллиқ мебошад. Айни замон ширкати «Фароз» бозори калони масолеҳи сохтмониро дар арафаи ба итмом расонидан қарор дорад, ки пас аз он нақша дорад соҳибкорони бозори масолеҳи сохтмонии «Ҷал-Ҷам»- ро ба онҷо бикӯчонад.

Имрӯзҳо ширкати «Фароз» яке аз бузургтарин ширкати тиҷоратӣ ба ҳисоб рафта дар соҳаҳои гуногун аз ҷумла — тиҷорат дар соҳаи бонкӣ, филизсозӣ, канданиҳои фоиданок, мактаби ронандагӣ, курорти ҷастгоҳӣ, терминалҳои гумрукӣ,  соҳаи фармасевтӣ, хизматрасониҳои тиббӣ ва ғайра фаъолият мебарад. Тобистони соли 2018 бо қарори ҳукумати Тоҷикистон ба ширкати «Фароз» ягона ҳуқуқи додани маълумотномаи тиббӣ барои дохилшавӣ ба мактабҳои таҳсилотӣ дода шуд.